Prezidente Repúblika, Francisco Guterres Lú Olo. Imajen António Gonçalves

DILI, 31 agostu 2020 (TATOLI)—Prezidente Repúblika, Francisco Guterres “Lú Olo”, ohin, hala’o reuniaun ho Konsellu Estadu (KE) atu deskute no halibur sira-nia hanoin kona-ba pedidu renovasaun estadu emerjénsia hosi Governu. Iha reuniaun ne’e, Konsellu Estadu rekomenda ba Xefe Estadu atu haruka pedidu ne’e ba Parlamentu Nasionál hodi deskute nune’e bele lori fali mai Prezidente Repúblika para Prezidente Repúblika dekreta Estadu Emerjénsia tuir mai.

Xefe Kaza Sivíl Prezidente Repúblika, Francisco Maria de Vasconcelos, hateten Konsellu Estadu fó rekomendasaun ne’e tanba iha nasaun viziñu Indonézia ne’ebá, moras COVID-19 ne’e ninia númeru aumenta nafatin.

Notísia Relevante: PR sei rona hanoin sira kona-ba pedidu renovasaun EE hosi KE-KSDS

“Ohin, Konsellu Estadu fó rekomendasaun ba Xefe Estadu atu haruka pedidu Estadu Emerjénsia ne’e ba Parlamentu Nasionál hodi deskute nune’e bele lori fali mai Prezidente Repúblika para Prezidente Repúblika dekreta Estadu Emerjénsia tuir mai. Tanba ita haree katak ita-nia nasaun vizinu Indonézia kada ves númeru aumenta no nafatin hanesan foin daudaun liubá, laiha mudansa liuliu ba aeroportu, portu no fronteira ne’ebé mak sai foku ba situasaun ohin,” dehan Xefe Kaza Sivíl Prezidente Repúblika, Francisco Maria de Vasconcelos iha Palásiu Prezidente Bairro-pite Aitarak-laran, Díli, segunda ne’e.

Tanba ne’e, nia dehan, aban sei lori ba Parlamentu Nasionál tanba aban sei iha reuniaun entre Konsellu Superiór Defeza Seguransa ho Prezidente Repúblika hodi ko’alia asuntu hanesan.

Prezidente Repúblika sei konsulta ho Konsellu Estadu no Konsellu Superior Defeza no Seguransa atu rona hanoin ida-idak husi orgaun konsultivu ne’e kona-ba renovasaun estadu emerjénsia, tuir artigu 85,  alínea g)  Konstituisaun RDTL.

Governu propoin renovasaun Estadu Emerjénsia ba períodu loron tolu-nulu(30) tanba Estadu emerjénsia ne’ebé Prezidente Repúblika dekreta, iha 5 agostu, ba periódu loron tolu-nulu (30), hahú husi 6 agostu, sei remata, iha 4 setembru 2020. 

Estadu Emerjénsia signifika katak sei iha medidas ne’ebé limita ka supende direitu balun liberdade balun no garantias balun ne’ebé Konstituisaun fó ba sidadaun ida-idak. Governu hanoin katak ho medida sira ne’e mak TL bele kombate no hamenus moras ne’e daet hosi ema ba ema iha Timor-Leste.

Membru  sira ne’ebé halo parte Konsellu Estadu mak Prezidente Repúblika Francisco Guterres Lú Olo, Eis-Prezidente Repúblika Xanana Gusmão, Eis-Prezidente José Ramos-Horta, Eis-Prezidente Repúblika no atuál Primeiru-Ministru Jeneral Taur Matan Ruak,  Prezidente Parlamentu Nasionál Aniceto Longuinhos Guterres Lopes.  Halo parte mós Konsellu ne’e membru sira nomeadu husi Prezidente Repúblika: Óscar Lima, Alcino de Araújo Barris, Maria Dadi Soares Magno, Laura Soares Abrantes no Faustino da Costa.  Husi Parlamentu Nasionál: Eduardo de Deus ‘Dusae’, Aurora Ximenes, José Cornélio Guterres, Árcangelo de Jesus Gouveia Leite no José dos Santos ‘Naimori Bucar’.

Membru  sira ne’ebé halo parte Konsellu Superior Defeza no Seguransa mak: Prezidente Repúblika Francisco Guterres Lú Olo, Primeiru-Ministru no Ministru Interiór Taur Matan Ruak, Ministra Negósius Estranjeirus no Kooperasaun  Maria Adalzija Magno, Ministru Defeza Filomeno Paixão,   Ministru Justisa Manuel Cárceres, Xefe Estadu Maior Jeneral F-FDTL Lere Anan Timur, Komisáriu PNTL Faustino da Costa no Diretór Jerál Servisu Nasionál Intelijénsia Manuel Serrano. Halo mós parte iha Konsellu ne’e,  membru sira nomeadu  husi Parlamentu Nasionál: Adérito Hugo da Costa, David Dias Ximenes, Abel Pires da Silva. Membru sira nomeadu husi Prezidente Repúblika mak: José Manuel Fernandes ‘Nakfilak’ no Cristina da Silva.

Jornalista: Osória Marques

Editór: Cancio

HAKEREK NO HATÁN

Please enter your comment!
Please enter your name here