Vise Ministru Interiór António Armindo, Komandante Munisípiu Dili, Superintendente Xefe, Henrique da Costa, Segundu Komandante Superintendente, Euclides Belo, Komandante Polísia Departamentu Nasionál Tránzitu no Seguransa Rodoviária, Superintendente João dos Reis Belo. Imajen Tatoli/Eugénio Pereira

DILI, 01 setembru 2020 (TATOLI)– Governu liuhusi Vise Ministru Interiór  António Armindo, ohin,  hala’o enkontru ho Komandu Polísia Munisípiu Dili hodi buka rezolve problema báziku, hanesan infraestrutura, lojístika no ekipamentu servisu ne’ebé polísia enfrenta durante ne’e.

Notísia Relevante : Governu sei estabelese tan postu UPF haat

Enkontru ne’e partisipa direta husi Komandante PNTL Munisípiu Dili, Superintendente Xefe Henrique da Costa, Segundu Komandante  Superintendente, Euclides Belo, Komandante Polísia Departamentu Nasionál Tránzitu no Seguransa Rodoviária, Superintendente João dos Reis Belo   no komandante eskuadra Atauro, Metinaro, Vera Krús, Nain Feto, Kristu Rei no Don Aleixo .

Superintendente Xefe, Henrique da Costa dehan, enkontru ne’e importante hodi relata atividade servisu operasaun PNTL hodi garante seguransa no hato’o mós dezafiu ne’ebé PNTL enfrenta

Dezafiu ne’ebé PNTL Dili hasoru, tuir Komandante Henrique da Costa,  barak tebes, maibé membru sira servisu nafatin tuir regra no orden komandu PNTL nian hodi lori Instituisaun PNTL Dili la’o ba oin ho di’ak liután.

Superintendente Xefe Henrique rekoñese membru PNTL Dili ho forsa 400-resin durante ne’e hasoru obstákulu servisu oin-oin menus transporte no lojístika no ekipamentu servisu sei hetan rezolve tuir planu orsamentu kada tinan.

Iha fatin hanesan, Vise Ministru Interiór António Armindo deklara, hafoin simu pose nia parte halo hamutuk ho Ministru Interiór nu’udar mós Primeiru-Ministru, Taur Matan Ruak, halo enkontru ho komandu PNTL hodi buka rezolve problema PNTL nian.

Vise Ministru Interiór mós halo vizita ba komandu PNTL sira iha munisípiu sira hodi haree postu Unidade Patrullamentu  Fronteira (UPF) no unidade seluk tan hasoru problema barak tebes.

“Ita nia infraestrutura ne’e ita tenke hadi’a husi fronteira, tinan oin, ita sei aumenta postu UPF neen, no dezeñu kompletu ho fasilita kampu jogu no seluk tan,” nia hateten.

Postu Eskuadra Don Aleixo Comoro, Dili, daudaun ne’e hetan ona apresiasaun husi Ministru Interiór, Taur Matan Ruak, hadi’a iha tinan oin, bainhira Orsamentu Jerál Estadu 2021 aprova.

OJE 2021 ba PNTL mós sei selu dívida millaun $2 liu, tanba ne’e Governu koordena ho PNTL sei rezolve problema báziku hotu iha 2022.

Ministériu Interiór rasik simu orden husi Primeiru-Ministru atu haree patrimóniu estadu hanesan karreta no motór sira ne’ebé aat ona tenke halo leilaun, tanba manutensaun ba transporte karun tebes.

Tuir planu Governu nian sei hili membru PNTL  ne’ebé iha esperiénsia sei ba tuir kursu ofisina hodi loke ofisina PNTL nian hodi halo poupansa ba osan Estadu.

António hatutan, razaun Governu atu loke ofisina ba PNTL, hodi evita pesoál sira labele halo invoice falsu kona-ba prosesu pagamentu ba transporte sira ne’ebé halo manutensaun iha kompañia privadu sira.

“Ita sei haruka ita nia membru sira tuir kursu ofisina para ita nia karreta aat ruma ofisina PNTL maka hadi’a hodi evita ema hasa’e presu sasán nia folin,” tenik nia.

Membru governu ne’e hato’o parabéns ba Komandu PNTL ho nia membru sira, mezmu hasoru dezafiu, maibé sira servisu nafatin implementa lei no orden hodi asegura seguransa ba sosiedade no nasaun.

Membru governu ne’e husu iha kada aldeia no suku pelumenus tenke monta Ofisiál Polísia Suku (OPS) na’in-haat hodi halo patrullamentu besik liután povu oinsá maka lori Dili sai fatin hakmatek.

Atu lori Timor-Leste sai husi risku konflitu no violénsia, Ministériu Interiór mós koopera nafatin ho sosiedade sivíl, komunidade no autoridade sira hodi halo servisu hamutuk.

Kona-ba estatutu PNTL nian ne’e rasik sei aprezenta fila-fali ba Komandu PNTL hodi haree no hadi’a di’ak liután foin halo apresiasaun ba Konsellu Ministru.

Jornalista  : Eugénio Pereira

Editór        : Francisco Simões

HAKEREK NO HATÁN

Please enter your comment!
Please enter your name here