Vise-Ministru Interiór, António Armindo. Imajen TATOLI/Egas Cristovão

DILI, 24 agostu 2020 (TATOLI)- Vise Ministru Interiór, António Armindo, hateten, iha tempu besik Governu servisu ho parseiru dezenvolvimentu Austrália sei estabelese tan postu haat ba Unidade Patrullamentu Fronteira (UPF) iha liña fronteira terrestre.

Notísia Relevante : Governu promete rezolve problema báziku UPF

 “Ita hakarak aumenta tan postu haat iha fronteira, agora iha faze ne’ebé Embaixada Austrália liuhusi Parseiru Dezenvolvimentu Timor–Leste ka Police Development Program (TLPDP) atu mobiliza sasán ba para bele harii postu sira-ne’e,” informa Vise Ministru António Armindo, ba jornalista, ohin, hafoin aprezenta planu ne’e ba Primeiru-Ministru Taur Matan Ruak, iha Palaçio do Governo, Dili.

Postu haat ne’ebé sei aumenta ho númeru UPF hodi reforsa seguransa iha fronteira postu Bobonaro, Covalima no Oe-Cusse nian.

“Ita sei koloka tan númeru UPF nian barak hodi halo seguransa metin liután iha liña fronteira terrestre,” nia hateten.

Postu UPF aumenta hodi kompleta postu UPF ne’ebé harii ona hamutuk 30-resin iha liña fronteira terrestre.

Primeiru-Ministru Taur Matan Ruak mós husu nafatin atu UPF no F-FDTL servisu hamutuk garante seguransa iha liña fronteira no kontribui ativu evita moras COVID-19 tama husi fronteira terrestre.

PM Taur husu ba Vise Ministru António atu kuidadu atu asina dokumentu Estadu nian ruma ne’ebé liga ho servisu administrasaun tenke kuidadu no rigór.

“Primeiru Ministru orienta mai ha’u atu asina dokumentu ruma karik tenke kuidadu, ta’uk orasida ita asina sala tiha, ema bele lori ita ba kadeia,” nia hateten.

Foin lalais ne’e, Vice Ministru António rasik halo ona vizita ba postu UPF hodi haree direita kondisaun no problema ne’ebé membru UPF sira enfrenta hodi aprezenta ba Governu atu bele tau konsiderasaun.

Durante enkontru ne’e,  Vise Ministru António aprezenta mós ba PM Taur kona-ba polítika Governu hodi lansa ona vistu negósiu klase I no II hodi fasilita setór privadu kontribui taxa ba Estadu Timor-Leste.

Vistu negósiu ho klase I ho durasaun tempu fulan-neen, ne’ebé fó oportunidade ba investor potensiál sira hodi esplora klima negósiu nasionál, inklui prosesu setup negósiu.

“Se buat hotu lao tuir planu negósiu nian, sei follow up ho vistu negósiu klase 2, ho durasaun too tinan-rua (2).,” nia esplika.

Jornalista   : Eugénio Pereira

Editór        : Francisco Simões

HAKEREK NO HATÁN

Please enter your comment!
Please enter your name here