Prezidente Repúblika,Francisco Guterres Lú Olo. Imajen Tatoli/António Gonçalves

DILI, 30 agostu 2020 (TATOLI)—Prezidente Repúblika (PR), Francisco Guterres “Lú Olo”, sei reúne ho Konsellu Estadu (KE) no Konsellu Superior Defeza no Seguransa (KSDS) atu rona hanoin sira kona-ba pedidu renovasaun estadu emerjénsia hosi Governu.

Prezidente Repúblika sei konsulta ho Konsellu Estadu no Konsellu Superior Defeza no Seguransa atu rona hanoin ida-idak hosi orgaun konsultivu ne’e kona-ba renovasaun estadu emerjénsia, tuir artigu 85,  alínea g)  Konstituisaun RDTL.

Reuniaun Konsellu Estadu nian sei hala’o aban, 31 agostu, tuku 9:30 daeersan no Konsellu Superior Defeza no Seguransa sei hala’o iha loron 01 setembru, tuku 09:30 dadeersan iha Palásiu Prezidénsial Nicolau Lobato, Bairru Pité, Dili.

Governu propoin renovasaun Estadu Emerjénsia ba períodu loron tolu-nulu (30) ba Estadu emerjénsia ne’ebé Prezidente Repúblika dekreta, iha 05 agostu 2020 ba periódu loron tolu-nulu (30), hahú hosi loron 06 agostu 2020 sei ramata iha loron 04 setembru 2020. 

Estadu Emerjénsia signifika katak sei iha medida ne’ebé limita ka suspende direitu balun, liberdade balun, no garantia balun ne’ebé Konstituisaun fó ba sidadaun ida-idak. Governu hanoin katak ho medida sira-ne’e mak ita bele kombate no hamenus moras COVID-19 ne’e da’et hosi ema ba ema, iha Timor-Leste.

Hafoin rona ona opiniaun hosi membrus Konsellu Superior Defeza no Seguransa no Konsellu Estadu no haree katak presiza halo duni renovasaun Estadu Emerjénsia,   Prezidente Repúblika sei husu autorizasaun hosi Parlamentu Nasionál liuhosi mensájen ida. Karik Parlamentu Nasionál aprova, Prezidente Repúblika sei dekreta renovasaun Estadu Emerjénsia liuhosi Dekretu Prezidensiál.

Membru sira-ne’ebé halo parte Konsellu Estadu mak Prezidente Repúblika Francisco Guterres “Lú Olo”, Eis-Prezidente Repúblika Xanana Gusmão, Eis-Prezidente José Ramos-Horta, Eis-Prezidente Repúblika no atuál Primeiru-Ministru, Jeneral Taur Matan Ruak, Prezidente Parlamentu Nasionál Aniceto Longuinhos Guterres Lopes. 

Halo parte mós Konsellu ne’e hosi membru sira nomeadu hosi Prezidente Repúblika: Óscar Lima, Alcino de Araújo Barris, Maria Dadi Soares Magno, Laura Soares Abrantes no Faustino da Costa.  Hosi Parlamentu Nasionál, Eduardo de Deus ‘Dusae’, Aurora Ximenes, José Cornélio Guterres, Árcangelo de Jesus Gouveia Leite no José dos Santos ‘Naimori Bucar’.

Membru sira ne’ebé halo parte Konsellu Superior Defeza no Seguransa mak Prezidente Repúblika Francisco Guterres Lú Olo, Primeiru-Ministru no Ministru Interiór, Taur Matan Ruak, Ministra Negósius Estranjeirus no Kooperasaun  Maria Adalzija Magno, Ministru Defeza Filomeno Paixão,   Ministru Justisa Manuel Cárceres, Xefe Estadu Maior Jeneral F-FDTL Lere Anan Timur, Komisáriu PNTL Faustino da Costa no Diretór Jerál Servisu Nasionál Intelijénsia Manuel Serrano.

Halo mós parte iha Konsellu ne’e, membru sira nomeadu hosi Parlamentu Nasionál Adérito Hugo da Costa, David Dias Ximenes, Abel Pires da Silva. Membru sira nomeadu hosi Prezidente Repúblika mak: José Manuel Fernandes ‘Nakfilak’ no Cristina da Silva.

Komunikadu Imprensa

HAKEREK NO HATÁN

Please enter your comment!
Please enter your name here