Ministru Koordenadór Asuntu Ekonómiku, Joaquim Amaral. Imajen Tatoli/Egas Cristovão

DILI, 30 agostu 2020 (TATOLI)-Mininistru Koordenadór Asuntu Ekonómika (MKAE), Joaquim Amaral, enkoraja produtór setór privadu no kooperativa atu hasa’e produsaun, nune’e bele ajuda Governu prepara implementasaun medida cesta bázika ba kurtu prazu hodi distribui ba família iha territóriu tomak.

“Ha’u husu ajuda ba ita bo’ot sira, empreza ki’ik no médiu inklui kooperativa sira iha área produtivu atubele halo produsaun barak hodi sirkula iha merkadu, tanba Governu sei sosa hodi distribui iha fulan novembru no dezembru,” dehan Mininistru Joaquim Amaral,  iha seremónia enserrementu esposizaun produtu lokál iha Fundasaun Hanai Malu, Bairro Pité, domingu ne’e.

Governu prevee ona millaun $71,5 hodi implementa medida ne’e, ho objetivu atu fó apoiu ba nesesidade bázika família, kombate hamlaha ba família vulnerável liu, apoiu ba agrikultór, produtór no komersiante lokál no apoiu ne’e sei entrega ho forma voucher, ho preferénsia produtu nasionál iha merkadu lokál.

Notísia Relevante: Komisaun rekuperasaun ekonómika rekomenda medida haat ba Governu

Governante ne’e informa, osan ne’ebé Governu prepara atu sosa maka produtu sira iha merkadu nasionál.

“Tenke badinas no koordena malu prepara imi-nia produsaun atubele lori ba merkadu,” nia akresenta.

Tuir Ministru, inisiativa ne’e nu’udar meiu ida ba rekooperasaun ekonómia ne’ebé Governu dezeña ona.

“Pelumenus medida emediatu iha kurtu prazu hosi juñu to’o dezembru, ajuda populasaun idaidak inklui setór privadu sira atubele hahú filafali sira-nia atividade,” nia subliña.

Governu mós sei regulariza populasaun sira ne’ebé halo negósiu kiik iha dalan ninin no halo serbisu iha área infomál hodi enkaixa-an iha sistema seguransa sosiál

“Nune’e sira bele iha fali kbiit halo atividade loron-loron no bele kontribui ba dezenvovimentu ekonomia ne’ebé sei hahú iha 2021,” nia realsa.

 Jornalista: Natalino Costa

Editora: Julia Chatarina

HAKEREK NO HATÁN

Please enter your comment!
Please enter your name here