Ministru Koordenadór Asuntu Ekonómiku, Joaquim Amaral. Imajen Tatoli/Egas Cristovão

DILI, 24 agostu (TATOLI)-Ministru Koordenadór Asuntu Ekonómiku, Joaquim Amaral, hateten tuir rekomendasaun Komisaun ba Elaborasaun Planu Rekuperasaun Ekonómika iha relatóriu propoin kestaun haat importante ba rekooperasaun ekonómika atu Governu bele konsidera no implementa.

“Rekomendasaun espesiál ne’ebé maka komisaun rekomenda maka iha medida haat ba kurtu prazu atu implementa to’o dezembru 2020, kompostu hosi fahe ai-han ba sidadaun, regulariza komersiante iha setór informál hanesan sira ne’ebé lori taxi, fa’an sasán iha dalan ninin atu lori sira entegra iha sistema sosiál no protesaun sosiál ne’ebé Estadu dezeña hanaran seguransa sosiál,” tenik Ministru Joaquim Amaral, iha edifísiu Institutu Apoiu Dezenvolvimentu Emprezariál (IADE), Bebora, segunda ne’e.

Notísia Relevante: Governu aprova planu rekuperasaun ekonómika

Medida seluk maka ajuda emprezáriu sira labele lakon negósiu ka labele taka sira-nia negósiu inklui labele hapara funsionáriu atu lakon rendimentu no mantein empreza sira iha merkadu.

“Sira ne’ebé benefia medida ne’e tenke empreza ne’ebé rejistu ona iha sistema seguransa sosiál,” nia akresenta.

Tuir governante ne’e, programa fahe ai-han ba sidadaun idaidak sei hala’o iha fulan-rua nia-laran.

“Programa fahe ai-han sei hahú iha novembru no dezembru ho totál orsamentu millaun $71, ne’ebé sei hola ai-han sira iha merkadu lokál no nasionál, nune’e bele re-distribui  filafali ba sira no sei insentiva ba sira ne’ebé prodús ai-han atubele iha vontade prodús barak tan ba kompradór sira,” nia subliña.

Kustu ba programa fahe ai-han ba sidadaun tomak ne’e sei integra iha Orsamentu Jerál Estadu (OJE) 2020.

Iha loron 29 jullu, Konsellu Ministru aprova medida kurtu prazu ba mitigasaun impaktu krize ekonómika ne’ebé rezulta hosi pandemia COVID-19, iha ámbitu planu rekuperasaun ekonómika.

Medida hirak ne’e ho objetivu prinsipál atu apoia hatán ba sidadaun sira-nia nesesidade bázika sira, apoia traballadór sira iha setór informál, mantein postu traballu no rendimentu no mantein empreza iha merkadu.

Governu deside atribui bein alimentár sira no ijiene pesoál esensiál lubuk ida, hanaran ‘’cesta básica’’ ka nu’udar alternativa “voucher’’ hodi sosa sasán ne’ebé sei fó ba sidadaun hotu ne’ebé hela iha Timor-Leste no sasán sira sei maihosi produsaun nasionál ka lokál.

Empreza ka entidade empregadora sira seluk hosi setór privadu sei hetan apoiu liuhosi kria subsídiu mensál ida ho karatér pekuniáriu, ne’ebé sei atribui durante fulan lima nia-laran ba entidade empregadora ne’ebé hala’o fali atividade ho forma regulár, lahó suspensaun ka hamenus oráriu normál serbisu.

Maski nune’e, empreza sira presiza rejista iha seguransa sosiál, iha administrasaun fiskál no mós entidade ne’ebé seidauk iha kondisaun atubele hala’o fali atividade regulár hodi bele enkuadra iha setór turizmu.

Entidade empregadora sira mós sei hetan dispensa devér ba pagamentu kontribuisaun sosiál sira ba kargu durante períodu fulan-neen nia laran.

Kria ona apoiu ida ba traballadór hosi setór informál liuhosi kria subsídiu ekivalente ho porsentu 60 hosi valór remunerasaun konvensionál ne’ebé sai nu’udar baze insidénsia kontributiva hosi primeiru eskalaun ba adezaun fakultativa ba rejime kontributivu seguransa sosiál durante fulan-outubru, novembru no dezenbru.

Atu bele hetan asesu ba apoiu ne’e, benefisiáriu sira tenke rejista iha seguransa sosiál iha fulan agostu no setembru 2020, ho kondisaun ida katak sei halo pagamentu ba kontribuisaun sira ne’e ba seguransa sosiál durante fulan-tolu tuirmai, sura hosi loron ne’ebé simu ona prestasaun dahikus subsídiu nian. 

Jornalista: Natalino Costa

Editora: Julia Chatarina

HAKEREK NO HATÁN

Please enter your comment!
Please enter your name here