DILI, 30 agostu 2020 (TATOLI)-Sekretaria Estadu Kooperativa (SEKoop) enserra ona espozisaun ba promosaun produtu kooperativa, ne’ebé realiza durante loron-10 hahú 20 to’o 30 agostu, iha ámbitu komemorasaun tinan 45 Frente Armada Libertasaun Timor-Leste (FALINTIL) no tinan 21 Loron Konsulta Populár ka Referendu.
Sekretáriu Estadu Kooperativa, Elizário Ferreira, hateten espozisaun ne’e atu komemora loron importante rua no iha tempu hanesan atu promove produtu lokál hosi empreza no membru kooperativa sira.
“Ami sei kontinua atividade hanesan ne’e iha futuru, nune’e ema hotu bele hetan oportunidade ba negósiu, hosi empreza ki’ik no médiu inklui membru kooperativa sira bele halo atividade di’ak liután,” tenik Sekretáriu Estadu ne’e, iha seremónia enserramentu esposizaun, iha Fundasun Hanai Malu, Bairro Pité, domingu ne’e.
Notísia Relevante: Komemora aniversáriu FALINTIL, SEKoop organiza espozisaun promove produtu kooperativa
Governante ne’e enkoraja operadór ekonómika sira nafatin promove produtu lokál hodi ajuda rekuperasaun ekonómika.
“Kooperativa sira, tempu ona ita promove produtu lokál tanba la’ós ita se tan? Tanba ne’e presiza eduka ita-nia ema sira atu hadomi produtu rasik,” nia fó hanoin.
Biban hanesan, nia parte agradese entidade hotu ne’ebé hola parte hamutuk ho SEKoop realiza eventu nasionál ne’e ho susesu no ambiente di’ak.
Nia mós husu parte ne’ebé envolve bele koopera nafatin no kontribui ba dezenvolvimentu ekonomia.
Negosiante 87 partisipa iha espozisaun kooperativa
Iha biban hanesan, Mininistru Koordenadór Asuntu Ekonómika, Joaquim Amaral, enserra programa ne’e no agradese partisipante 87 ne’ebé harame esposizaun ho produtu lokál ho entusiazmu maski Timor-Leste hetan impaktu hosi pandemia COVID-19.
“Ha’u lori Governu nia naran, hakarak hato’o agradesimentu boot ba partesipante sira tanba loron sanulu eventu ne’e la’o ho susesu no laiha asidente ruma iha eventu ne’e. Ita bele dehan iha loron sanulu nia laran Dili sai sidade ida hakmatek no bele iha movimentu di’ak tebes,” Ministru dehan.
Tuir Goverante ne’e, espozisaun nu’udar konsentasaun emprezáriu setór produtivu no kooperativa sira hodi hasoru malu no haree posibilidade balun liuhosi ligasaun ne’ebé iha bele kontribui ba dezenvolvimentu ekonomia hafoin krize COVID-19.
Nia apresia SEKoop tanba bele iha inisiativa di’ak realiza esposizaun hodi promove produtu lokál ba komunidade sira.
“SEKoop realiza ona eventu di’ak tebes ba komemorasaun loron importante rua, tanba ne’e ha’u kongratula Sekretaria Estadu Kooperativa ba realizaun eventu ida ne’e,” nia dehan.
Ministru ne’e agradese mós autoridade suku Bairro Pité no komunidade sira ne’ebé hatudu kolaborasaun di’ak ho parte SEKoop hodi fó susesu ba espozisaun.
Seremonia ne’e partisipa hosi Ministru Turizmu, Komérsiu no Indústria, José Lucas do Carmo da Silva inklui Vise-Ministru Turizmu, Komérsiu no Indústria, Domingos Lopes Antunes no reprezentante hosi Banco Central Timor-Leste (BCTL).
Iha seremonia ne’e, SEKoop entrega sertifikadu ba partisipante espozisaun produtu lokál.
Jornalista: Natalino Costa
Editora: Julia Chatarina
