Membru Governu sira partisipa iha abertura espozisaun promove produtu kooperativa, iha Fundasaun Hanai Malu, Bairro Pité, kinta (20/08). Imajen/SEII

DILI, 20 agostu 2020 (TATOLI)Iha ámbitu komemorasaun aniversáriu Frente Armada Libertasaun Timor-Leste (FALINTIL) ba dala-45, Sekretaria Estadu Kooperativa (SEKoop) ho inisiativa rasik organiza espozisaun promosaun produtu kooperativa, mikro no pequena empreza.

Eventu ne’e realiza hahú ohin to’o loron 30 agostu.

“Espozisaun ne’e atu komemora loron FALINTIL ba dala-45 no atu promove produtu kooperativa, inklui mikro no pequena empreza sira-nia produtu ba públiku, inklui atu eduka sidadaun hotu atu hahú hadomi produtu rai-laran,” tenik Sekretáriu Estadu Kooperativa, Elizário Ferreira, hafoin loke espozisaun iha Fundasaun Hanai Malu, iha Bairro Pité, kinta ne’e.

Governante ne’e informa, grupu sira ne’ebé partisipa iha espozisaun ne’e maka membru kooperativa rasik inklui mikro no pequena empreza sira  hosi Munisípiu Dili, Maliana no Viqueque.

Kustu ba eventu ne’e hamutuk $10.000, tamba espozisaun ne’e maihosi inisiativa no espíritu membru kooperativa nian.

Produtu ne’ebé halo promosaun iha espozisaun ne’e maka hanesan Sorghum ka Batar foos Kay Rala, tasi been ne’ebé nakfila ba bee-gallon hosi Munisípiu Liquiçá, produtu lokál hanesan ai-farina, fehuk talas, inklui produtu artezenatu sira ne’ebé aprezenta hosi joven kreativu sira.

MKAE konsidera espozisaun bele ajuda normaliza atividade negósiu

Iha fatin hanesan, Ministru Koordenadór Asuntu Ekonómiku (MKAE), Joaquim Amaral, konsidera espozisaun ne’e di’ak tanba bele fó biban ba komunidade sira, liuliu ba negosiante mikro no pequena empreza hodi halo atividade negósiu no hetan rendimentu.

“Espozisaun ne’e inisiativa di’ak tebes hosi SEKoop, tanba ho espozisaun ne’e nu’udar maneira ida mós atu komemora loron FALINTIl ba dala-45,” nia subliña.

Ministru ne’e nota katak, eventu ne’e oportunidade di’ak tebes tanba durante krize COVID-19, atividade ekonomia nasaun paralizadu no la efetivu, afeta ba vida nasaun no negosiante tanba menus atividade negósiu, maibé ho espozisaun bele fó oportunidade ba negosiate fa’an fali produtu hodi hetan rendimentu.

“Oportunidade ne’e tenke aproveita halo didi’ak, tanba kuaze fulan-neen nia-laran atividade negósiu to’o tuku lima laiha ona, maibé ho atividade espozisaun sira ne’e bele to’o tuku ualu ba leten, nune’e fó oportunidade halo negósiu ho di’ak,” nia apresia.

Ministru Joaquim observa, atividade ekonomia parte kalan iha sidade Dili la’o menus tebes maibé ho feira, negosiante bele aproveita.

“Ha’u orgullu no kontente tebes ba inisiativa Sekretariu Estadu Kooperativa, tanba ho situsaun agora bele mobiliza maluk negosiante sira hodi promove sira-nia produtu,” nia realsa.

Membru Governu hanesan Ministru Administrasaun Estatál Miguel de Carvalho, Ministru Petróleu no Minerál Víctor da Conceição, Vise-Ministru Turizmu Komunitáriu Inâcia da Conceição Teixeira, Vise-Ministru Komérsiu no Indústria Domingos Lopes Antunes, Sekretáriu Estadu Igualidade no inkluzaun Maria José da Fonseca Monteiro de Jesus, no Sekretáriu Estadu Formasaun Profisionál Alarico do Rosário.

Jornalista: Natalino Costa

Editora: Julia Chatarina

HAKEREK NO HATÁN

Please enter your comment!
Please enter your name here