Diretór Ezekutivu HNGV Aniceto Cardoso Barreto. Imajen/Egas Cristovão

MAUBARA, 28 agostu 2020 (TATOLI)-Diretór Ezekutivu Ospitál Nasionál Guido Valadares (HNGV-sigla portugés), Aniceto Barreto, hateten HNGV hanesan ospitál top referál iha Timor-Leste tanba ne’e presiza hadi’a ninia jestaun hodi presta diak liután servisu ba populasaun.

”Tanba Ospitál Nasionál Guido Valadares ne’e hanesan ospitál top referál iha Timor-Leste entaun tenki hadi’a ninia jestaun tantu iha jestaun klíniku no intervensaun klíniku no jestaun administrasaun sira seluk,” dehan nia ba jornalista sira hafoin halo aprezentasaun  kona-ba polítika no padraun ba prosedimentu operasionál HNGV  nian iha Salaun Madre Carmelita Maubara, Munisípiu Liquiça, sesta ne’e.

Notísia Relevante :HNGV diskute polítika no prosedimentu operasionál

Kona-ba tratamentu ba pasiente sira, nia hateten HNGV tenki iha padraun ida ne’ebé maka iha uniformizasaun  servisu entre profisionál saúde bainhira halo tratamentu ba pasiente sira.

Tanba padraun hirak ne’e maka bele lori HNGV atu atinje ninia objetivu sira liliu hasa’e kualidade servisu.

”Padaraun ne’ebé mak ita uza ne’e durante tinan ida ita prepara hamutuk 119 padraun depois aprezenta iha área espesialidade ninia tanba padraun ne’e lori ita uniformiza tratamentu mós sai baze de dadus ida atu bele halo evaluasaun ba ita-nia performasaun kada individuál no mós kada instituisaun ne’e rasik,” tenik Aniceto.

Padraun hirak ne’e sai mós kritéria atu halo avaliasaun ba akreditasaun ospitál nian nivel nasionál no rejionál.

“Ha’u hanoin ida ne’e mak importante ospitál prepara hela espera katak padraun ne’e bele utiliza ba hotu-hotu no médiku sira husi estranjeiru mós orientadu tenki uza padraun ida ne’e hodi bele halo tratementu uniformiza,” katak Nia.

Durante ne’e HNGV uza padraun universal maihosi Organizasaun Mundiál Saúde (OMS),

“Padraun seluk husi rejionál nian ne’ebé mak ita utiliza maibé HNGV rasik liliu Ministériu Saúde ba intervensaun sekundáriu no tersiáriu kuaze seidauk iha tanba ida ne’e ajuda ita atu halo tratamentu ne’ebé mak di’ak no redúz risku  ba mal prátika,” nia hateten.

Jornalista : Felicidade Ximenes

Editór       : Agapito dos Santos

HAKEREK NO HATÁN

Please enter your comment!
Please enter your name here