Família boot IDN-TL selebra sira-nia aniversáriu ba dala-X ho atividade marxa saudavel hodi la’o-ain husi área Becusi-Taibesi ba área Laulara-Aileu. Imajen/IDN-TL

DILI, 28 agostu 2020 (TATOLI)-Família boot Institutu Defeza Nasionál Timor-Leste (IDN-TL), kinta (27/08), selebra sira nia aniversáriu ba tinan-X ho atividade marxa saudavel hodi la’o-ain husi área Becusi-Taibesi ba área Laulara-Aileu.

Notísia Relevante : IDN-TL selebra tinan-X ho programa haat no grande debate

Marxa saudavel ne’e partisipa husi ema liu 100  lidera husi Diretór Institutu Defeza Nasionál (IDN), Kapitaun-Mar-e-Guerra, Donaciano Costa Gomes “Pedro Klamar Fuik” ho funsionáriu tomak, membru FALINTIL-Forsa Defeza Timor-Leste (F-FDTL), Polísia Nasionál Timor-Leste, (PNTL), Estudante Universidade da Paz (UNPAZ) ho mós Conselho de Imprensa Timor-Leste.

Pedro Klamar Fuik dehan, marxa saudavel ne’e nu’udar eventu ikus liu ne’ebé IDN-TL halo, hafoin selebra aniversáriu ba dala-X  ho atividade oin-oin, inklui semináriu nasionál ho grande debate ne’ebé hala’o ona.

“Ami la’o ain hanesan marxa ida hodi komemora loron aniversáriu IDN ba dala-X ne’ebé halo nia eventu balun importante hodi hato’o ideia istóriku balun ba konvidadu sira no estudante sira inklui Institutu Defeza Nasionál nian atu haree hikas fali sobre saida mak ita nia lider sira halo iha 1975,” esplika Pedro Klamar Fuik ba jornalista iha nia rezidénsia Suku Laulara, Munisípiu Aileu.

Nia dehan, IDN realiza semináriu sira hodi halibur lider sira nia hanoin hodi fó kontribuisaun prosesu konstrusaun Estadu no Nasaun.

Tuir nia haree katak, prosesu ba funu libertasaun nasionál ne’ebé hahú iha 1975 lori funu naruk too tinan 24 sai lisaun importante ba lider, inklui jerasaun foun sira atu fó nafatin sira-nia kontribuisaun hodi harii nasaun ne’e ho dame.

Nia hatutan, prosesu funu naruk Timor-Leste ne’e hakerek ho tinta osan-mean ne’ebé prezerva iha livru oin-oin no dokumenta iha Muzeu Rezisténsia rai hela istória furak ba jerasaun foun mai hodi hatene.

Tuir planu IDN nian ba oin sei tau plaka ba fatin rezisténsia subar fatin ne’ebé lider sira hela ba nu’udar memória institusionál hodi prezerva istória Timor-Leste nian.

“Ami hanoin katak se bele karik aban bainrua koloka memoriál ruma ka fatin monumentu ruma para kontinua rezerva nune’e bele kontinua halo kaminhadas hanesan ne’e ba jerasaun foun sira tuir mai atu hatene prosesu luta ne’e,” nia hateten.

Jornalista   : Eugénio Pereira

Editór        : Francisco Simões

HAKEREK NO HATÁN

Please enter your comment!
Please enter your name here