Alunu IDN-TL na’in 36 hasai fotografia hamutuk molok tuir kursu iha IDN-TL. Imajen/IDN-TL

DILI, 13 agostu 2020 (TATOLI)- Institutu Defeza Nasionál Timor-Leste (IDN- TL) hahú ohin, loron 13 to’o loron 27 agostu 2020, sei selebra aniversáriu ba tinan X prezensa IDN ho programa prioridade haat no kria  grande debate envolve lider Timoroan sira.

Notísia Relevante : Partisipante Formasaun “Governansa no Lideransa Estratéjia” Apresia Ho IDN-TL

Diretór IDN-TL,Kapitaun de Mar -e- Guerra, Donaciano Costa Gomes “Pedro Klamar Fuik”. Imajen/ António Goncalves

Prezidente komisaun oganizadora baa aniversáriu IDN-TL ba dala-X, Tenente Koronél, Beneditos Dias Quintão “Punu Fanu” dehan, selebrasaun ne’e halo nu’udar reflesaun ba servisu susesu no dezafiu ne’ebé IDN-TL implementa tinan-X bele hetan xave inovasaun planu no programa dezenvolve instituisaun ne’e ba oin ho forte liután kontribui ba dezenvolvimentu ekonomia, polítika, defeza no seguransa iha rai-laran.

“Aniversáriu IDN-TL ba dala-X hanesan reflesaun ida, sei halo atividade importante haat; primeiru maka, kaminada, segundu grande debate IDN-TL, espozisaun fotografia, prémiu literáriu ba poezia no vizita eskola iha munisípiu lima hanesan Dili, Aileu, Ermera, Manatuto no Liquiça,” informa Tenente Koronél, Beneditos Dias Quintão “Punu Fanu” liuhusi konferénsia imprensa iha IND-TL, ohin, iha Palaçio do Governo, Dili.

Punu Fanu dehan, iha programa debate, IDN konvida intelektuál Timoroan sira atu partisipa debate tema sentrál   oin-oin ne’ebé sei hala’o husi loron 25 to’o  loron 26 agostu 2020.

Oradór sira ne’ebé IDN sei konvida maka, Rui Gomes, João Saldanha sei debate ho tema sentrál ‘Sustentabilidade Ekonomia’.

Iha debate segundu ho tema sentrál ‘Seguransa no Defeza Nasionál’ sei partisipa husi oradór membru Parlamentu Nasionál Bankada PD, Mariano Assanami Sabino,  Premiadu Nobel da Paz, José Ramos Horta, Prezidente Komisaun B Parlamentu Nasionál, Jose Agostinho Somotcho, no Vise Ministru Interiór.

Debate seluk tan ho tema ‘Dezafiu Estratéjiku Impaktu COVID-19 ba Timor-Leste’ sei hala’o iha loron 26 agostu 2020 ho oradór Ministra Saúde, Odete Maria Freitas, eis Ministru Saúde, Rui Maria de Araújo ho moderadór husi IDN.

Tema seluk tan maka ‘Polítika Nasionál Edukasaun’ sei hato’o husi Ministru Edukasaun, Armindo Maia, Sekretaria Estadu Igualdade Jéneru, Prezidente Komisaun D Parlamentu Nasionál, Antonino Bianco no eis membru Governu, Avelino Coelho ne’ebé sei debate lidera husi oradór Aurelio Guterres, Virgilio Guterres, José Manuel, no Nuno Carlvalho.

Debate ne’e sei partisipa husi membru governu, korpu diplomátiku, reprezentante partidu polítiku, konfisaun relijioza, sosiedade sivíl no universitáriu sira.

Mata dalan ba profile IDN

IDN-TL, harii iha agostu 2010, ho legalidade husi dekretu lei númeru 12/2010 de 26 de agostu ne’ebé lideradu husi Kapitaun de Mar -e- Guerra, Donaciano Costa Gomes “Pedro Klamar Fuik”  hahú servisu iha Maiu 2012.

Diretór Servisu Akademia IDN, Guilherme Soares dehan, órgaun ida ne’e tutela husi Governu ho kompeténsia iha Ministériu Defeza ne’ebé kompete iha estudu, investigasaun no hanorin matéria relasiona ho Seguransa no Defeza Nasionál (SDN). IDN integradu iha administrasaun indireta husi Estadu no goza autonomia administrativu, finanseira no patrimoniál.

Prinsipalmente atividade IDN garante relasaun ida espesiál ho órgaun barak husi Governu iha kompeténsia relasiona ba SDN, espesiál F-FDTL no PNTL.

Aniversáriu IDN marka iha loron 30 agostu hanesan mós data prinsipál ida ne’ebé povu Timór tomak  komemora loron Konsulta Populár ka Referendum.

Vizaun IDN hakarak konstitui hanesan polu exelénsia iha dezenvolvimentu pensamentu no planeamentu estratéjiku nasionál, iha ensinu, formasaun no iha investigasaun iha área SDN.

IDN mós mai ho nia objetivu prinsipál harii konsiénsia nasionál ida husi SDN ne’ebé kontribui ba dezenvolvimentu ekonómiku, sosiál no kulturál rai nian, no kontribui ba formasaun kualifikasaun no valorizasaun kuadru superiór husi forsas armadas, forsas no servisu seguransa, funsaun públika, nune’e mós ba sosiedade sivíl hotu.

IDN iha misaun kontribui ba dezenvolvimentu pensamentu no planeamentu estratéjiku nasionál liuhusi promosaun ensinu no formasaun, investigasaun no debate kona-ba área SDN.

Iha kualidade hanesan fatin ensinu superiór, IDN kontribui ba formasaun ofisiál husi F-FDTL no husi PNTL husi dezempeña funsaun komandu, diresaun, xefia no Estadu Maiór.

IDN promove nafatin hala’o kursu, la’ós konferentes grau akadémiku importante ba atribuisaun diploma, hanesan kursu promosaun, atualizasaun no kualifikasaun, tirosinius no estajiu no kursu formasaun komplementa karreira.

IDN mós fó valorizasaun ema-liu husi oferta formasaun solidu ida fokaliza iha harii koñesimentu sientífiku no tékniku no iha respeitu ba prinsípiu doutrina militár no la’ós militár iha dezenvolvimentu pensamentu estratéjiku.

Kualidade iha dezempeñu haklaken ezijénsia rigor ida no exelénsia iha hanorin, estudu no investigasaun ba transparénsia iha prosesu jestaun institusionál.

Inovasaun iha kultura organizasionál- tradús iha jestaun di’ak, iha hili metodolojia no abertura ba sosiedade hodi kontribui ba konsiénsia SDN.

Ensinu formasaun no investigasaun 

Hanesan instituisaun Estadu servisu ba sidadaun Timór, par ho formasaun militár no polísia, IDN promove nakloke-an ba sosiedade sivíl, fó atensaun espesiál ba joven, lideres no ba Veteranu Rezisténsia Nasionál.

Área Ensinu, IDN-TL promove kursu hanesan,  Kursu Estadu Maiór Conjunto Integradu (CEMCI, sigla portugés), Kursu Promosaun Ofisial Superior (CPOS, sigla iha portugés),  Post-Graduasaun iha Estudu Estratéjiku,  Kursu Empreendedorizmu no Dezenvolvimentu nasionál,  Kursu Seguransa no Defeza Nasionál  ba xefe suku 450 no kursu Portuguesa.

Área Formasaun ba Sidadania, IDN promove realizasaun konferénsia, palestras, debates no reflesaun kona-ba temátika sosiu-kulturais, polítika, estratéjia ekonomia, modelu kooperasaun internasionál, meiu ambiente, rekursu naturaís, fronteira platas forma kontinentais, tasi, espasu aéreu, integrasaun regionál no seluk.

IDN promove mós transmisaun televiziva iha nivel nasionál programa fulan-fulan ho karris informativu kona-ba temátika relasionada ho seguransa no defeza nasionál-Programa Timór XXI.

IDN promove mós edisaun revista ida ho karakter kuadrimestral kona-ba asuntu ho interese espesiál iha seguransa no defeza nasionál.

Área investigasaun, dezenvolvimentu inovasaun, hamutuk ho organizasaun no realizasaun siklu estudu fó ba grau akadémiku, kursu pós-sekundarius no kursu formasaun pós-graduadu, IDN mós atividade I &D+I, hanesan iha área sosiolojia, lideransa, estratéjia, rasionalizasaun, jeopolítika, globalizasaun no TIC.

Atividade 2019

Iha kuarta  edisaun Kursu Promosaun Ofisiál Superior (CPOS) frekuenta husi ofisiais husi F-FDTL no PNTL, hodi forma, kualifika no valoriza membru husi forsas armadas no husi forsas no servisu seguransa iha planu sientífiku, doutrinariu no tékniku siénsia militár no polísia, posibilita sira hodi hala’o funsaun seguransa fó ba sira.

Terseira edisaun post graduasaun iha Estudu Estratéjiku no Resiliência Nasionál (PGEERN), Primeira edisaun post-graduasaun iha estudu tasi (PGESMAR) parseria ho Instituto Superior de Siénsia da Informasaun e da Administrasaun (ISCSP).

Primeira edisaun kursu SDN – kursu fó ba 452 xefe suku husi munisípiu 12, inklui RAEOA no Postu Administrativu 65, aborda temátika relasionada ho seguransa no defeza, edukasaun no sidadania, estadu-podér lokál no ambiente no protesaun sivíl.

Kursu Empreededorismu no Dezemvolvimentu Nasionál ho finalidade forma  emprendedora nasionais hodi domina pasu esénsia hodi harii no dezenvolve negósiu.

Programa Tv “Timór XXI’– iha públiku-alvu ba sosiedade sivíl hotu, IDN promove transmisaun televizivu iha nivel nasionál programa iha kada fulan.

Semana Akadémiku- sesaun solene taka tinan 2018 no loke tinan 2019. Inklui mós konferénsia “loron estratéjia” omenajen ba Lider Rezisténsia Nasionál, Kay Rala Xanana Gusmão, iha kuadru komemorativu loron veteranu hanesan figura nasionál Seguransa Konsensualmente Personifika iha vida espíritu no istória husi Forsas Armadas TL.

Atividade Akadémika IDN- Hodi promove ba valorizasaun rekursus umanus, atualiza kompeténsia no koñesimentu tékniku-Militares no PolÍsia, F-FDTL no PNTL ho koñesimentu akadémiku adekuadu hodi hala’o misaun simu hodi kontribui ba prosesu dezenvolvimentu nasionál.

Konferénsia Nasionál no internasionál – kona-ba temátika relasionada ho área SDN Seguransa no Defeza Nasionál.

Projetu husi I&D+I-Estudu karaterizasaun pesoál Militár no polisiál no investigasaun kona-ba elementu husi identidade populasaun Timoroan. Hamutuk ho auditorés sira seluk seguransa frequenta kursu iha IDN.

Durante tinan X, IDN mós kria kooperasaun servisu ho parseria sira hanesan UNTL, UNPAZ, Instituto Superior de Ciências Sociais e Polítikas da Universidde Lisboa-(ISCSP),  Instituto Superior da Ciências da Informação e da Administração-ISCIA

Instituto Universitáriu Militár (IUM),  Instituto de Defesa Nacional de Portugal-(IDNPT),  Instituto Hidrogáfico de Portugal-IH, Guarda Nacional Republicana (GNR), Universidade Autónoma de Lisboa (UAL) ho Timor-Telecom.

Jornalista   : Eugénio Pereira

Editór        : Francisco Simões

HAKEREK NO HATÁN

Please enter your comment!
Please enter your name here