Sekretáriu Estadu Arte no Kultura, Teófilo Caldas. Imajen/Tatoli Egas Cristovao

DILI, 28 agostu 2020 (TATOLI)-Governu liuhusi Sekretáriu Estadu Arte no Kultura (SEAC) no Sekretáriu Estadu Komunikasaun Sosiál (SECOMS-sigla portugés), sesta ne’e lansa relatóriu ba implementasaun konvensaun UNESCO 2005 kona-ba protesaun no promosaun ba diversidade espresaun kulturál.

Lansamentu ne’e parte rua hala’o iha edifísiu SEAC Praia dos Coqeiros Dili.

Notísia Relevante :2020, TL Haruka Tais Ba UNESCO Hetan Rekoñesimentu Sai Patrimóniu Kulturál No Materiál

“Relatóriu primeiru ba UNESCO Timor-Leste nian kona-ba protesaun no promosaun ba diversidade espresaun kulturál hanesan Estadu membru ida ne’ebé mak ratifika ona konvensaun ne’e mak iha obrigasaun submete relatóriu periodika ba tinan haat hodi relata polítika no implementasaun oioin mak Governu hala’o,” dehan Sekretáriu Estadu, Teofilo Caldas.

Governante dehan, SEAC agradese ba servisu maka’as husi parte hotu liliu instituisaun Governu no Organizasaun Naun Govermentál (ONG) ho sira nia apoiu maka finaliza  ona relatóriu ne’e.

“Relatóriu ne’e submete ona ba Sekretariadu UNESCO iha 14 Jullu 2020 liubá, tulun mós hosi parte hotu mak hetan nia susesu,” tenik Caldas.

Submisaun relatóriu ba UNESCO ne’e, hanesan relatóriu  dahuluk Governu Timor-Leste hodi haforsa liután kompromisu Governu atu dezenvolve setór kultural ida  sustentavel tuir prinsinpiu konvensaun nian.

Timor-Leste ratifika konvensaun UNESCO ne’e iha tinan 2016

“Sekretariu Estadu Arte Kultura mak orgaun Governu ne’ebé iha kompeténsia no papel importante atu halo protesaun ba diversifikasaun espresaun kulturál Timor-Leste nian liuhosi kriasaun inventáriu kulturál apoiu atividade ba kresimentu grupu kulturál,” nia hateten.

Iha fatin hanesan Sekretáriu Estadu Komunikasaun Sosiál, Merício Akara, hateten apresia ba servisu SEAC nian ne’ebé halo durante ne’e tanba iha duni susesu.

Ho relatóriu sira hanesan ne’e bele promove ona kultura Timor-Leste nian ba mundu Internasionál.

Notísia Relevante :Governu Apoiu Rejistu Múzika “Tebe-Tebe” Iha UNESCO Sai Genre Foun

Jornalista : Hortencio Sanchez

Editór       : Agapito dos Santos

HAKEREK NO HATÁN

Please enter your comment!
Please enter your name here