Dieter Jerál Ministériu Solidaridade Sosiál no Inkluzaun (MSSI), Rui Manuel Gago Exposto.Imajen Tatoli/Osória Marques.

DILI, 27 agostu 2020 (TATOLI)–Diretór Jerál Ministériu Solidaridade Sosiál no Inkluzaun (MSSI), Rui Manuel Gago Exposto, hateten Governu nafatin iha kompromisiu sei selu reklamasaun hirak ne’e maibé sei haree no sei halo análiza ne’ebé di’ak liu atu labele mosu problema

Notísia Relevante: MSS finaliza verifikasaun dadus reklamasaun sa’e ba 16.000-resin

“Ita nafatin iha kompromísiu ida katak sei kontinua selu reklamasaun maibé ita sei haree no sei halo análiza ne’ebé di’ak liu atu labele mosu problema bainhira halo pagamentu,” dehan Rui Manuel Gago Exposto ba Agência TATOLI, iha nia knaar fatin MSSI Caicoli, Dili, kinta ne’e.

Tanba, tuir nia, reklamasaun hamutuk rihun 16 no finál ne’e 15.743 mak tama mai sistema MSSI nian, agora kontinua halo análiza ba reklamasaun hirak ne’e ida pur ida no liga ba lei pagamentu nian.

“Hosi 15.743 ne’e ita sei halo tan análiza parese rihun 11, se lae rihun 12 hanesan ne’e mak elizivél. Tanba, reklamasaun hotu la signifika atu simu hotu tanba reklamante balun ne’e simu ona osan maibé hakarak atu separa hosi fixa família hodi simu tan osan, ne’e la razoável,” nia dehan.

Ba asuntu ne’e, nia dehan, husik parte relevante mak halo investigasaun no halo análiza atu nune’e labele repete tan esperiénsia pagamentu dahuluk nian ne’e.

Diretór ne’e haktuir, reklamasaun hirak ne’e la’ós atu simu hotu subsídiu ne’e maibé sei haree tuir lei mak elizivél entaun simu no ida e’ebé mak la tuir lei ne’e labele simu.

Bainhira halo hotu tiha análiza ba reklamasaun, nia dehan, sei kruza no konsulta ho rekomendasaun hosi CAC nian ne’e tanba CAC automatikamente iha lista reklamasaun ne’ebé tenke kruza tiha lai keta naran balun iha laran karik hasai tiha.

Nia hateten, ida-ne’e reklamasaun la’ós nia mai rejistu no dokumentu kompleta ona nia bele simu ona maibé reklamasaun tenke halo análiza no kruza ho rekomensaun mak foin deside ida ne’ebé mak elizivél atu simu no lae.

“Tanba ne’e MSSI sei halo análiza profunda ba reklamasaun bazeia ba CAC nia rekomendasaun,” nia dehan. 

Jornalista: Osória Marques

Editór: Cancio Ximenes

HAKEREK NO HATÁN

Please enter your comment!
Please enter your name here