Koordenadór Jerál Sekretariadu Konsellu Jestaun Fundu COVID-19 no Diretór Jerál Orsamentu Estadu Ministériu Finansa, Januário da Gama. Imajen Tatoli/Egas Cristovão

DILI, 12 juñu 202O (TATOLI) – Orsamentu hamutuk millaun $150 ne’ebé Parlamentu Nasionál (PN) aprova hodi responde halo prevensaun no metigasaun surtu COVID-19 iha Timor-Leste no aloka ba ministériu no instituisaun hamutuk 13 hahú ezekuta iha loron 28 abríl no to’o agora ezekusaun atinje ona porsentu 64.

Koordenadór Jerál Sekretariadu Konsellu Jestaun Fundu COVID-19, Januário da Gama, hateten ezekusaun ne’e menus husi fulan-rua maibé kuaze konklui, maski sei iha défise iha finansiamentu programa balun.

“Ezekusaun ba fundu COVID-19 ho alokasaun fundu hamutuk millaun $150 husi abríl to’o 10 juñu konsege ezekuta ona porsentu 64 bainhira ita inklui nível obrigasaun no kompromisu, no bainhira eksklui no haree de’it ba pagamentu reál maka ezekusaun to’o ona porsentu 60,” informa Koordenadór ne’e hafoin reuniaun Konsellu  Jestaun ba dala-hitu nian, iha Salaun Auditórium Ministériu Finansa, Aitarak-Laran, sesta ne’e.

Atuál Diretór Jerál Orsamentu Estadu Ministériu Finansa ne’e dehan, Sekretáriu Tékniku iha nesesidade aprezenta ba Konsellu Jestaun tanba iha pedidu husi Parlamentu Nasionál (PN) atu semana oin Governu liuhosi Ministériu Finansa ne’ebé halo jestaun ba Fundu COVID-19 nian sei aprezenta  ezekusaun fundu iha PN.

“Hafoin Parlamentu Nasionál iha ona informasaun maka bele tetu no deside kona-ba nesesidade finansiamentu ba défise Fundu COVID-19, ne’ebé Governu hatama ona proposta ba Parlamentu liuhosi alterasaun lei ba levantamentu estraordinária Fundu Petrolíferu ninian,” nia akresenta.

Iha loron 3 juñu, liuhosi reuniaun Konsellu Ministru aprova ona proposta husu autorizasaun ba PN hodi halo transferénsia estraordinária husi Fundu Petrolíferu ho montante millaun $286,8 hodi sustenta mákina Estadu inklui reforsa Fundu COVID-19 ne’ebé la sufisiente kobre despeza ba pakote ekonómiku.

Pedidu levantamentu dahuluk, iha loron 2 abríl PN aprova pedidu levantamentu Governu no iha loron 6 abríl Prezidente Repúblika, Francisco Guterres ‘Lú Olo’ promulga ona Dekretu Parlamentu Nasionál númeru 14/V, kona-ba autorizasaun ba realizasaun transferénsia estraordinária husi Fundu Petrolíferu ho montante millaun $ 250.

Husi totál orsamentu millaun $250 ne’ebé aprovadu, millaun $150 aloka ba finansiamentu medida prevensaun no kombate moras COVID-19 iha ámbitu Fundu COVID-19, millaun $100 ba konta jerál tezouru no husi millaun $150 ne’e, aloka $500.000 ba PN atu dezenvolve polítika no programa iha ámbitu prevensaun no kombate surtu COVID-19.

Alokasaun osan iha Fundu COVID-19 fahe ba programa tolu maka hanesan programa dahuluk maka prevensaun no metigasaun COVID-19 ho ninia montante orsamentu hamutuk millaun $125,9, husi verba ne’e sei finansia sub-programa hamutuk 10.

Progaram daruak mak aumenta produsaun no produtividade ho ninia alokasaun hamutuk millaun $4.9 no programa datoluk maka asesu produtu alimentár iha alimentasaun servisu ho ninia alokasaun orsamentu hamutuk millaun $19,1.

Alokasaun orsamentu iha fundu ne’e ba instituisaun hamutuk 13, ne’ebé kompostu husi alokasaun ba Parlamentu rasik tuir lei ne’ebé aprova iha PN iha kabimentu hamutuk $500.000.

Aleinde ne’e, aloka ba iha Gabinete Primeiru-Ministru hamutuk millaun $1,6, Sekretáriu Estadu Komunikasaun Sosiál hamutuk $207.000, Ministériu Agrikultura no Peska millaun $4,9, Ministériu Negósiu Estranjeiru no Kooperasaun millaun $2,4, Ministériu Finansa $900.000, Ministériu Saúde millaun $52,4, Ministériu Solidariedade Sosiál no Inkluzaun millaun $15.

Enkuantu, Ministériu Turizmu, Komérsiu no Industria millaun $6, FALINTIL-Forsa Defeza Timor-Leste (F-FDTL) millaun $12,5, Polísia Nasionál Timor-Leste (PNTL) $670.000, Sentru Lojístika Nasionál (CLN, sigla portugés) hamutuk millaun $19,1, CIGC millaun $34,5 hanesan fundu rezerva.

Jornalista: Antónia Gusmão

Editora: Julia Chatarina

HAKEREK NO HATÁN

Please enter your comment!
Please enter your name here