Komandante Jerál PNTL, Komisáriu Faustino da Costa. Imajen/Dok. Tatoli

DILI, 26 agostu 2020 (TATOLI)- Komandu Polísia Nasionál Timor-Leste (PNTL) husu kolaborasaun Igreja Katólika no Grupu Rezisténsia Nasionál Defende Justisa Konstituisaun RDTL (RNDJK) atu kria paz no dame bainhira organiza masa hodi halo asaun pasífiku kontra Prezidente Repúblika, Francisco Guterres “Lú Olo”.

Notísia Relevante : RNDJK husu autorizasaun polísia atu “demo” hasoru PR Lú Olo

Komandante Jerál PNTL, Komisáriu Faustino da Costa, deklara parte PNTL simu ona informasaun no karta ofisiál hodi portavós RNDJK, Angela Freitas, hodi husu lisensa halo asaun pasífiku iha loron 4 setembru 2020.

Nia dehan, molok asaun demonstrasaun ne’e atu halo, Komandu PNTL sei konvida hikas portavós RNDJK, Angela Freitas, atu kompleta rekizitu sira durante asaun atu labele mosu provokasaun krime ruma.

“Atu husu parte Igreja Katólika ka señora Angela Freitas, ha’u fiar katak, ita presiza hanoin dook, e segundu ita iha estadu emerjénsia atu ejerse direitu ida-ne’e tuir direitu, maibé direitu ida ne’ebé sira labele viola fali lei,” hateten Komandante Jerál PNTL, Faustino da Costa, ohin, ba  jornalista iha Sentru Formasaun Polísia, Comoro Dili.

PNTL rasik rona ona informasaun katak, molok grupu sira ne’e halo asaun sei halo mós misa selebrasaun boot ida ne’ebé organiza husi padre Igreja Katólika sira.

“Primeiru atu dehan de’it informasaun ne’ebé imi mídia sira rona, ami mós rona hanesan ne’e, maibé ami seidauk simu informasaun karta ofisiál ruma. Timor-Leste ne’e estadu direitu demokrátiku, ema hotu bele hato’o nia aspirasaun no ideia, maibé buat ne’ebé hatuur tenke la’o tuir Konstituisaun RDTL,” Faustino da Costa hateten.

PNTL mós husu ba manifestante sira durante halo asaun tenke kumpre regra saúde hodi prevene aan husi propagasaun COVID-19, tanba Timor-Leste implementa hela Estadu Emerjénsia.

PNTL mós sei koloka membru PNTL husi unidade hotu- hotu atu kontrola asaun pasífiku ne’ebé grupu ne’e halo bele la’o ho di’ak hodi evita problema ruma.

Jornalista   : Eugénio Pereira

Editór        : Francisco Simões  

 

HAKEREK NO HATÁN

Please enter your comment!
Please enter your name here