Komandante Operasaun Nasionál PNTL, Superintendente Xefe Pedro Belo ho ofisiál PNTL halo enkontru ho Portavós Grupu Rezisténsia Nasionál Defende Justisa Konstituisaun (RNDJK) Angela Freitas iha Komandu Jerál PNTL Caicoli, Dili, 24 agostu 2020. Imajen/Dok. Tatoli

DILI, 24 agostu 2020 (TATOLI)- Portavós Grupu Rezisténsia Nasionál Defende Justisa Konstituisaun Repúblika Demokrátika Timor-Leste (RNDJK), Angela Freitas, ohin, hala’o enkontru ho Komandante Operasaun Nasionál PNTL, Superintendente Xefe, Pedro Belo hodi husu autorizasaun polísia nian atu sira halo manifestasaun (demo) ka asaun pasífiku iha Dili  hasoru Prezidente Repúblika (PR), Francisco Guterres Lú Olo.

Notísia Relevante : RNDJK Mobiliza Masa Atu Entrega Petisaun Ba PR Lú Olo

Grupu ne’e hato’o ona karta pedidu ba Komandu PNTL atu hala’o asaun pasífiku iha loron 4 setembru 2020, ne’ebé sei koloka masa hodi konsentra entre fatin-rua; iha área Tasi Tolu no eis kampu 744, Becora, Dili.

Portavós RNDJK, Angela Freitas deklara katak, asaun ne’e sei partisipa másimu husi populasaun sira husi munisípiu sira hodi hato’o sira nia petisaun ba PR Lú Olo hodi solusiona krize polítika no problema violasaun Konstituisaun RDTL ne’ebé tuir grupu ne’e katak komete husi PR Lú Olo.

Angela garante asaun pasífiku ne’e sei la’o tuir regra no sei la mosu problema konflitu ruma tuir akordu ne’ebé hato’o ba Komandu Jerál PNTL.

“Ami mai husu lisensa atu asaun pasífiku ne’ebé  sei realiza iha loron 4 setembru 2020, hetan autorizasaun husi autoridade polísia,”  hateten Angela Freitas ba jornalista iha Komandu Jerál PNTL, Caicoli, Dili.

Asaun ne’e halo ho objetivu atu povu munisípiu 12, inklui RAEOA hato’o sira-nia aspirasaun polítika ba Prezidente Repúblika nu’udar aman ba nasaun hodi bele solusiona impase polítika ne’e tuir mandamentu Konstituisaun nian.

“Povu iha direitu atu hato’o sira nia aspirasaun polítika hodi ko’alia kona-ba violasaun sira ne’ebé akontese iha rai-ne’e nia-laran. Tanba ita haree meja no kadeira tohar no rahun iha Parlamentu Nasionál ne’e krime ka lae no viola lei ka lae,” afirma Angela Freitas.

Angela garante katak asaun pasífiku ne’e sei la hamosu krime ruma, tanba ne’e husu mós ba Xefe Estadu Maiór Jenerál FALINTIL-Forsa Defeza Timor-Leste (F-FDTL), Majór Jenerál Lere Anan Timor, labele ameasa ho forsa ba manifestante sira hodi hato’o sira nia aspirasaun.

“Labele mai ho forsa atu ameasa sidadaun sira ne’ebé hakarak hato’o espirasaun livremente kona-ba rai ne’e bainhira monu iha situasaun ida grave,” nia hateten.

Nia hatutan, sidadaun no forsa sira hotu tenke fó protesaun ba Estadu ne’e atu labele monu ba krize polítika, atu nune’e, povu no Estadu bele moris livre iha prosesu demokrasia respeita ba lei no Konstituisaun mak boot liu.

Tuir kalkulasaun masa ne’ebé Angela sei hatún hodi halo asaun pasífiku bele too ema rihun atus tolu-liu.

“Ami rekolla ona dadus iha populasaun hamutuk rihun 180-liu no bele too tan rihun atus tolu-liu reprezenta povu hodi hato’o sira nia direitu kona-ba problema iha rai laran,” Angela Freitas afirma tan.

Tuir observasaun grupu RNDJK nian katak, durante kaer ukun, Prezidente Repúblika, Francisco Guterres Lú Olo rasik viola konstituisaun no iha Parlamentu Nasionál mós deputadu sira viola lei no konstituisaun, maibé Prezidente Repúblika la fó solusaun atu hakotu no rezolve problema hirak ne’e.

Iha fatin hanesan, Portavós PNTL, Superintendente Xefe, Arnaldo de Araújo, informa, molok grupu ne’e atu realiza sira-nia asaun iha loron 4 setembru, Komandu PNTL sei halo fila fali enkontru ho portavós Angela Freitas ho nia ekipa hodi prienxe rekizitu sira tuir lei hodi asaun halo labele mosu problema ruma.

Arnaldo esplika, rekizitu  ne’ebé grupu ne’e tenke submete ba PNTL mak tenke aprezenta totál númeru partisipante manifestasaun hodi komandu PNTL bele prepara rekursu no fó fatin halo asaun iha área Tasi Tolu ka eis Kampu 744, Becora, hodi labele hamosu engarrafamentu.

“Enkontru ne’e seidauk iha konkordánsia ba malu, tanba sira tenke prienxe rekizitu balun hanesan, fatin, ema sira atu mai iha foho konsentra iha Tasi Tolu ka iha Becora tenke kumpre regra hotu maka foin bele halo enkontru fila fali hodi fó autorizasaun,” Arnaldo  hateten.

Arnaldo dehan, PNTL sei prepara rekursu sufisiente ba kualkér asaun ne’ebé grupu ne’e sei halo hodi garante paz no dame.

Jornalista   : Eugénio Pereira

Editór        : Francisco Simões

HAKEREK NO HATÁN

Please enter your comment!
Please enter your name here