Diretór Institutu Defeza Nasionál Timor-Leste (IDN-TL), Kapitaun-de-Mar-e-Guerra, Donaciano Costa Gomes “Pedro Klamar Fuik” . Imajen/Egas Cristóvão

DILI, 26 agostu 2020 (TATOLI)- Institutu Defeza Nasionál Timor-Leste (IDN- TL) ,tinan ne’e,  kompleta ninia ezisténsia ba  dala-X (agostu 2010-agostu 2020) ho legalidade husi dekretu lei númeru 12 / 2010 de 26 de Agostu ne’ebé lideradu husi Kapitaun de Mar -e- Guerra, Donaciano Costa Gomes “Pedro Klamar Fuik”.

Notísia Relevante : Governu uza RSE 3% la sufisiente dezenvolve ekonomia ho lalais

Ho tinan X ne’e, Diretór IDN-TL, Kapitaun -de-Mar-e-Guerra, Donaciano Costa Gomes “Pedro Klamar Fuik”  dehan, sira realiza programa oin-oin no programa grande debate  ho  tema ‘Dezafiu  Futuru’ ho objetivu atu halibur idea konstrutivu husi oradór sira hodi fó kontribuisaun ba konstrusaun Estadu no nasaun

“Objetivu prinsipál husi atividade meza redonda ida-ne’e , atu komemora tinan-X ba IDN-TL. grande debate ida-ne’e atu lori IDN ba futuru,  no au mézmu tempu kontribui ba konstrusaun Estadu no nasaun,” hateten “Pedro Klamar Fuik” liuhusi komunikadu imprensa ne’ebé Agência Tatoli asesu, ohin.

Pedro Klamar Fuik hatutan, IDN hanesan instituisaun estadu ida, bele partisipa iha konstrusaun Estadu no nasaun  liuhusi atividade grande debate ne’e,  bele estimula, hanoin estratéjika husi partisipante sira, sosiedade sivíl, estudante no akademia sira, militár no polisiál, no governate no Parlamentu Nasional, sira ida-idak  halo debate uitoan kona-ba tema nasionál,  relasiona ho prosesu konstrusaun Estadu.

“Saída maka IDN hakarak rona iha grande debate ida ne’e, kona-ba partisipante sira nia persesaun, ba entendimentu, estabilidade ekonómika, seguransa, defeza nasionál, ho sub dezafiu estratéjiku ba impaktu COVID- 19, no polítika nasionál  edukasaun, inklui área sira seluk enkuadra iha prosesu konstrusaun Estadu nasaun,” Pedro Klamar Fuik hateten.

Grande debate ne’e rasik IDN  hahú halo ona iha loron 25 to’o 26 agostu 2020, iha Palaçio do Nobre, Lahaten, Dili, hetan partisipasaun másimu husi lider rezisténsia sira, sosiedade sivíl, akadémika, militár, polisiál, membru parlamentu nasionál no membru governu.

Iha grande debate ne’e, IDN prepara tema sentrál “Dezafiu  Futuru” ho ninia sub tema haat  hanesan,   Sustentabilidade Ekonomia iha sesaun dadeer ho oradór Vice Ministra Finansas, Sara Brites, no Professor Doutór Avelino Coelho.

Iha sesaun lokraik  ho sub-tema  Seguransa  no Defeza Nasionál ho orador Prezidente Komisaun B Asuntu Defeza no Negósiu Estranjeiru Parlamentu Nasional, Deputadu José Agostinho Siquera “Somotxo, Deputado Aderito Hugo, reprezentante husi Ministériu Interiór José  Turqel,   Capitão-de-Mar-e-Guerra, Higino das Neves, Sekretaria Estadu Igualdade, Maria José da Fonseca Monteiro de Jesus.

Iha loron ba daruak tuir programa  ba loron ohin 26 agostu 2020, kontinua debate iha sesaun dadeer ho sub-tema Dezafiu Estratéjiku ba Impaktu COVID-19 ho oradór reprezentante husi Vise Ministériu Saúde Boinifacio Maukoli dos Reis , eis Ministru Saúde, Rui Maria de Araújo ho deputadu Francisco Mirando Branco no sesaun  lokraik ho sub-tema Polítika Nasional Edukasaun ho oradór  Sekretaria  Estadu Igualdade Inkluzaun Maria José da Fonseca Monteiro de Jesus no  Profesór doutór Avelino Coelho no Prezidente Komisaun D Parlamentu Nasional Deputadu, Antonino Bianco, Ministru Edukasaun, Professor Doutór Armindo Maia, Diretór FONGTIL, Daniel do Carmo, Padre Martinho Gusmão.

Atividade grande debate ne’e rona mós hanoin hosi Diretór Kapitaun-de-Mar-e-Guerra, Donaciano Costa Gomes “Pedro Klamar Fuik”  no remata ho plaka ho tara tais IDN hanesan prenda ba oradór no moderadór sira.

Jornalista   : Eugénio Pereira

Editór        : Francisco Simões

 

HAKEREK NO HATÁN

Please enter your comment!
Please enter your name here