DILI, 26 agostu 2020 (TATOLI)-Servisu Rejistu Notariadu (DRN), Ministériu Justisa (MJ) nian iha munisípiu hitu (7) seidauk bele halo atendimentu públiku ba emisaun pasaporte eletróniku.
Notísia Relevante : Governu Lansa Emisaun Pasaporte Eletróniku ba Munisípiu-10
Iha loron 9 juñu 2020, Ministériu Justisa lansa ona atendimentu públiku ba emisaun pasaporte eletróniku ne’ebé ho nia ekipamentu instala hotu ona iha munisípiu-10 hanesan, Manatuto, Baucau, Viqueque, Lautem, Aileu, Liquiça, Ermera, Manufahi, Ainaro no Suai. Enkuantu Munisípiu Dili, Bobonaro no Rejiaun Administrativu Espesiál Oe-Cusse Ambeno (RAEOA) lansa tiha ona iha tinan hirak liubá.
Diretór DNRN, Victor da Costa Neto, hateten, téknikamente ba sistema ekipamentu eletróniku instala prontu ona iha munsípiu-10 ne’ebé iha fulan hirak liu-ba lansa tiha ona. Momentu ne’e, Munisípiu Manatuto, Baucau no Lautem, loke efetivu atendimentu ba públiku.
“Enkuantu ba Munisípiu hitu (7) seluk seidauk bele tanba iha faze formasaun no akompañamentu husi ekipa diresaun nasionál ba funsionáriu tékniku iha munisípiu hirak ne’e,” informa diretór DNRN, Victor da Costa Neto, ba Agência Tatoli, ohin, iha nia kna’ar fatin, Colmera, Dili.
Nia hateten, polítika oitavu Governu liuhusi Ministériu Justisa nian ba alargamentu pasaporte eletróniku iha munisípiu hotu ho objetivu atu lori justisa hakbesik ba sidadaun liuhusi servisu atendimentu notariadu ne’ebé bele trata de’it iha kada munisípiu hodi la presiza mai to’o Dili.
Jornalista : Nelson de Sousa
Editór : Francisco Simões