Pasaporte Repúblika Demokratika Timor-Leste (RDTL). Imajen/Espesiál

MANATUTO, 09 juñu 2020 (TATOLI) – Governu liuhusi Ministériu Justisa (MJ),  tersa ne’e, ofisiálmente lansa atendimentu públiku ba emisaun pasaporte eletróniku iha munisípiu-10.

“Ohin, hakat tan pasu-ida ba atendimentu emisaun pasaporte eletrónika hahú ba munisípiu hotu, ho nune’e, ba sidadaun sira atu trata la presiza ba to’o iha Dili,” hatete Ministru Justisa Manuel Cárceres da Costa, iha nia diskursu iha ámbitu lansamentu pasaporte eletróniku ba munisípiu-10 ne’ebé hala’o ohin, iha Diresaun Nasionál Rejistu Notariadu (DNRN)  Munisípiu Manatuto.

Munisípiu-10 ne’e kompostu husi Munisípiu Manatuto, Baucau, Viqueque, Lautem, Aileu, Liquiça, Ermera, Manufahi, Ainaro ho Suai.  Enkuantu munisípiu Dili, Bobonaro ho Rejiaun Administrativu Espesiál Oe-Cusse Ambeno (RAEOA) lansa tiha ona hira tinan balun liu ba.

Ministru Justisa (MJ), Manuel Cárceres da Costa,  esklarese katak, kompromisu oitavu Governu nian atu lori justisa hakbesik ba sidadaun liuhusi serbisu atendimentu notariadu.

Serimónia lansamentu pasaporte eletróniku ba munisípiu-10 ne’e akompaña mós husi Sekretária Estadu Terras no Propriedade (SETP), Mario Ximenes, Administradór Munisípiu Manatuto, Fernando Junior Sousa, Defensór Públiku Jerál, Câncio Freitas, Diretór Servisu Rejistu Notariadu husi Munisípiu hotu no konvidadu sira seluk tan.

Ministru Justisa Manuel Cárceres da Costa husu diresaun serbisu munisípiu hotu atu kuidadu ekipamentu no fasilidade sira ne’ebé kria ona hodi fó atendimentu ba públiku, no komprometidu sei aposta nafatin prioridade sira hodi mellora serbisu públiku sira.

Iha fatin hanesan Diretór Jerál Rejistu Notariadu, Crisogno da Costa Neto informa, kona-ba instalasaun ekipamentu eletróniku ba pasaporte finaliza iha munisípiu sira ne’e no prontu atu halo atendimentu.

Nia hatete, téknikamente husi lansamentu ne’e hahú ohin husi Munisípiu Manatuto, Baucau, Viqueque ho Lautem bele ona halo atendimentu ba públiku. Maibé munisípiu-neen (6) seluk hanesan Aileu, Ainaro, Covalima, Ermera, Liquiça no Manufahi,  seidauk bele realiza atendimentu tanba funsionáriu tékniku sira sei tuir formasaun tékniku ba emisaun pasaporte durante fulan juñu nia-laran.

Administradór Munisípiu Manatuto, Fernando Junior Sousa, lori povu Manatuto nia-naran hato’o agradese ba Governu no orgullu ho esforsu Governu nian ne’ebé bele atribui serbisu no atendimentu  besik liu ba povu.

Nia mós husu funsionáriu sira atu halo kooperasaun no partisipasaun ho responsabilidade no dedikasaun tomak atu serbisu ba públiku nia espetativa no públiku nia interese.

Jornalista : Nelson de Sousa

Editór       : Francisco Simões

1 KOMENTÁRIU

HAKEREK NO HATÁN

Please enter your comment!
Please enter your name here