Prezidente Konsellu Veteranu, Vidal de Jesus “Riak Leman". Imajen Tatoli/Osoria Marques.

DILI, 25 agostu 2020 (TATOLI)-Prezidente Konsellu Veteranu, Vidal de Jesus “Riak Leman”, hateten veteranu la falsu maibé ema mak falsifika dokumentu hodi rejistu ba veteranu nu’udar veteran ida.

Riak Leman hatutan, iha 2003 bainhira loke rejistu ba veteranu sira no bainhira halo hotu tiha verifikasaun no aprova tiha maibé to’o ikus deteta ema barak halo falsifikasaun ba dokumentu. 

“Falsifikasaun ne’ebé mak tama ona iha Ministériu Asuntu Kombatente Libertasaun Nasionál hamutuk na’in 3000 no hosi na’in-3000 ne’e na’in-500 mak iha ona inspetór jerál nia meza leten no balun iha ona Polísia Sientífika Investigasaun Kriminál (PSIK) nia liman,” Prezidente Konsellu Veteranu, Vidal de Jesus “Riak Leman”, hato’o ba Agência TATOLI iha nia knaar fatin SERVE, Obrigado-Barak, Madaoru, Dili, tersa ne’e.

Tipu falsfikasaun dokumentu ne’e, nia hateten, mai hosi ema ne’ebé mak rejistu ne’e dehan mate iha vila-laran, agora sira rejistu bosok dehan mate iha ai-laran no dala balun ema tentara sira oho tiha mak intelijen sira dehan fali mate iha ai-laran hanesan FALINTIL.

Nia haktuir, ba asuntu ne’e hein de’it sé mak mai reklama no karik nia loos mak nia simu osan maibé karik nia halo falsifikasaun ba dokumentu mak rejistu entaun sei entrega kazu ne’e ba tirbunál hodi deside no fó solusaun ba ninia aktu ne’e.

“Hosi ema 3000 ne’e sei kansela tiha no sei la selu. Agora MAKLN hein de’it sé mak sei mai reklama. Sé ó loos mak ó simu osan maibé ó falsifika duni dokumentu mak solusaun ikus ó tenke ba tribunál, entrega ba Polísia Sientífika Investigasaun Kriminál (PSIK) no kanaliza ba Ministériu Públiku depois Tribunál mak fó solusaun,” Riak Leman hateten.

Prezidente Konsellu veteran ne’e rekoñese katak veteranu barak seidauk rejistu hahú hosi 2003 no foin daudauk ne’e halo verifikasaun ba 2009 nian de’it, maibé ida-ne’e mós foin mak verifika 20% hanesan ne’e. Tuir nia, barak mak seidauk verifika tanba rihun 200 kedas no karik Orsamentu Jerál Estadu (OJE) aprova ona mak sei kontinua halo verifikasaun ba dokumentu hirak ne’e.

“Bainhira ita halo verifikasaun ba 2009 nian mak hotu, Konsellu Veteranu haree oinsá para bele halo rejistu foun ba tinan 2003 nian,” nia relata.

Riak Leman hateten, agora rezolve uluk mak dokumentu ka dadus hosi 2003 no 2009 mak foin halo rejistu foun fali. Tanba ida-ne’e mós halo parte ba planu maibé depende ba polítika no andamentu servisu ne’ebé mak la’o.

Tanba ho ida-ne’e, nia dehan, iha veteranu barak mak seidauk rejistu inklui ho veteranu sira ne’eb’e durante ne’e hamahon iha organizasaun CPD-RDTL nia okos.

“Ami hatene no ita hotu hatene katak veteranu barak mak seidauk rejistu liuliu ita-nia maluk CPD-RDTL sira. Sira mós halo funu no terús ba rai ida-ne’e,” dehan Prezidenete Konsellu Veteranu ne’e.

Jornalista: Osória Marques

Editór: Cancio Ximenes

HAKEREK NO HATÁN

Please enter your comment!
Please enter your name here