DILI, 14 agostu 2020 (TATOLI)- Komandu Polísia Nasionál Timor-Leste (PNTL) liuhusi Unidade Patrullamentu Fronteira (UPF) kaptura  Timoroan na’in-10 ne’ebé halo atividade negósiu ilegál iha mota laran fronteira terrestre.

Notísia Relevante : João Sancho Pires Promete Lori UPF Hametin Lutu iha Fronteira Terrestre

Asaun kapturasaun ne’e mós nu’udar parte ida hodi evita tranzmisaun peste letál Coronavirus ka COVID-19 tanba nasaun viziñu hanesan Indonézia kontínua eziste propagasaun surtu COVID-19.

Komandante UEP, Superintendente João Sancho Pires, informa, ema hirak ne’e UPF kaptura liuhusi operasaun UPF iha Postu Alfa, Bravo no Charlie ne’ebé destaka iha fronteira terrestre Timor-Leste ho Indonézia.

Nia dehan, Prezidente Repúblika dekreta Estadu emerjénsia hodi prevene kalamidade surtu COVID-19 iha Timor-Leste, nune’e UPF mós simu kedas orientasaun husi Komandu Jerál PNTL hodi garante seguransa ba implementasaun Estadu emerjénsia (EE)  ba dahaat tuir Dekretu Governu Nu.10/2020.

“Ami kontinua halo kedas operasaun iha loron 6 agostu 2020,  iha Maliana, Suai too Oe-Cusse hodi minimiza ema tama no sai hodi prevene COVID-19, no iha semana kotuk, ami kaptura Timoroan na’in-10 ne’ebé halo tranzasaun iha mota laran,” dehan Komandante UPF João Sancho Pires, ba jornalista, ohin, iha Komandu UEP Bairru-Pité, Dili.

Komunidade sira ne’ebé UPF kaptura entrega kedas ba ekipa saúde COVID-19 hodi halo teste sira nia saúde no balun submete ona ba konfinamentu obrigatóriu ka kuarentena hodi evita propagasaun CIVID-19.

UPF mós kaptura estudante Timoroan balun ne’ebé halo viajen ilegál tama husi fronteira Atambua, Indonézia liu fronteira Batugadé, Covalima no Oe-Cusse hodi submete ba ekipa COVID-19 haruka hela iha kuarentena.

UPF mós kontinua sosializa informasaun ba populasaun iha liña fronteira hodi evita halo kontaktu ho komunidade sira husi Indonézia.

UPF hetan apoiu ekipamentu saúde husi Xanana

Iha parte seluk, Komandante João Sancho, informa, iha semana hirak liubá UPF hetan apoiu ekipamentu saúde husi lider Karizmátiku, Kay Rala Xanana Gusmão, bainhira la’o vizita ba postu UPF husi Batugade, Balibo, Maliana, Altu Lebos too Covalima, hodi sosializa informasaun ba povu liña fronteira sira atu kuidadu halo kontaktu ho povu Indonézia para prevene COVID-19.

Nia hatutan, UPF mós simu ona kontaktu sei akompaña lider karizmátiku, Xanana hodi halo viajen ba Oe-Cusse no vizita postu UPF hodi sosializa informasaun ba povu Oe-Cusse.

“Ami mós agradese akompaña Maun Boot Xanana vizita postu UPF hodi sosializa nafatin informasaun ba povu hodi evita COVID-19,” nia hateten.

Durante ne’e UPF no Komandu FALINTIL-Forsa Defeza Timor-Leste (F-FDTL) halo patrullamentu konjunta iha fronteira hodi kontrola movimentu tranzasaun negósiu atu prevene atividade ilegál no  prevene propagasaun COVID-19 liuhusi kontaktu entre komunidade Timor-Leste ho Indonézia iha liña fronteira terrestre.

Jornalista   : Eugénio Pereira  

Editór        : Francisco Simões

HAKEREK NO HATÁN

Please enter your comment!
Please enter your name here