Veteranu Rezisténsia, António Aitahan Matak no estrutura aprezenta karta ba Komandu PNTL, kinta (16/07/2020). Imajen/Eugénio Pereira

DILI, 16 jullu 2020 (TATOLI)- Grupu Rezisténsia Nasionál Defende Justisa Konstituisaun RDTL (RNDJK), ohin, aprezenta karta koñesimentu ba Komandu Polísia Nasionál Timor-Leste (PNTL) atu fó autorizasaun ba sira hodi akompaña hala’o atividade mobiliza masa hodi halo marsa ba paz no aprezenta karta petisaun ba Prezidente Repúblika, Francisco Guterres “Lú Olo” atu solusiona impase polítika iha rai laran.

Karta koñesimentu ne’e aprezenta direita hosi reprezentante Veteranu Rezisténsia RNDJK, António Aitahan Matak hodi entrega ba Komandante Jerál Polísia Nasionál Timor-Leste (PNTL), Komisáriu Faustino da Costa.

Karta koñesimentu ne’e parte PNTL seidauk bele aprova atu fó autorizasaun ba atividade RNDJK ne’ebé tuir planu sei hala’o, sesta aban (17/07) iha rezidénsia Portavós RNDJK, Angela Freitas iha Bairru Formasa-Dili.

Razaun karta koñesimentu PNTL seidauk bele aprova, tanba tuir lei PNTL presiza loron tolu atu estuda lalauk grupu ne’e mobiliza masa hodi halo asaun dame atu PNTL bele garante seguransa.

Reprezentante RNDJK, António Aitahan Matak, deklara, asaun dame ne’e sei la mosu problema, nune’e aban sira nia parte bolu de’it reprezentante RNDJK ne’ebé halibur mós forsa hosi partidu polítika sei hala’o enkontru hodi portavós Angela Freitas fó sai konteúdu hosi karta petisaun ne’e.

“Aban ne’e ami sei halo konsentrasaun de’it iha sede RNDJK, Bairru Formasa-Dili para grupu aprezenta sira nia opiniaun ba petisaun ne’ebé la konkorda desizaun Prezidente Repúblika nian.  Balun loos, balun laloos, ami sei rona sira membru nia opiniaun hodi entrega ba delegasaun hato’o ba Gabinete Prezidente Repúblika,” dehan António Aitahan Matan, ba jornalista, ohin, iha Komandu Jerál PNTL, Caicoli, Dili.

Kona-ba konteúdu hosi karta petisaun ne’e, Aitahan Matak lakohi esplika, tanba aban, portavós, Angela Freitas maka sei fó ba públiku através  konferénsia imprensa.

Veteranu rezisténsia ne’e husu ba públiku atu labele pániku, tanba RNDJK sei halo asaun ho dame iha sidade Dili, tanba grupu ne’e kumpre regra koopera ho entidade seguransa.

Nia hatutan, grupu RNDJ rasik la aseita impase polítika ne’ebé akontese iha rai laran too agora la iha solusaun no presiza rezolve lalais hodi labele hamosu problema iha rai laran.

Antahan Matak hatutan, nasaun ne’e atu la’o ba oin, ema hotu- hotu tenke respeita demokrasia no kumpre Konstituisaun RDTL.

Iha fatin hanesan, portavós PNTL Superintendente Xefe, Arnaldo de Araújo, deklara parte PNTL prontu koopera atu asegura seguransa ba grupu ne’e hodi halo sira nia atividade.

Nia hatutan, karta koñesimentu ne’e parte PNTL seidauk bele aprova hodi autoriza grupu sira mobiliza masa hodi halo asaun dame, tanba presiza estuda iha kontestu seguransa nian.

“Ami rona de’it sira nia opiniaun kona-ba atividade ne’ebé sira sei halo hodi koordena ho PNTL hodi garante estabilidade, ida ne’e maka importante liu,” nia hateten.

Komandu PNTL mós husu ba grupu sira ne’ebé atu mobiliza masa konsentrasaun atu garante nafatin paz iha Timor-Leste no espera iha tempu besik, grupu ne’e sei halo fila fali enkontru ho Komandu PNTL kona-ba sira-nia asaun iha tempu besik.

Jornalista   : Eugénio Pereira

Editór        : Francisco Simões

HAKEREK NO HATÁN

Please enter your comment!
Please enter your name here