Prezidente Repúblika, Francisco Guterres Lú Olo. Imajen/ António Gonçalves

DILI, 24 agostu 2020 (TATOLI) – Prezidente Repúblika, Francisco Guterres Lú Olo, ohin promulga lei Medida Prevensaun no Kombate Korrupsaun (MPKK).

Iha karta ba Parlamentu Nasionál, Xefe Estadu hatete: “Prevensaun no kombate kontra korrupsaun la’ós de’it  liuhusi aprovasaun lejislasaun no montajen sistema ba instituisaun sira ne’ebé nu’udar núkleu sentrál”.

Komunikadu ne’e hatutan: “Importante tebes, prevensaun no kombate korrupsaun atu instituisaun funsiona efetivamente tuir prinsípiu legalidade, izensaun, transparénsia, efisiénsia, efikásia, simplisidade no previsibilidade ba prosedimentus; no mós iha partisipasaun husi atór prinsipál sira, inkui instituisaun profisionál sira no sidadaun iha área no prosedimentu ho finalidade atu servi interese públiku”.

Promulgasaun lei ne’e sei hametin liután fiar públiku ninian ba instituisaun sira ne’ebé Estadu harii.  Atu nune’e, ba oin, implementasaun lei ne’e sei hametin filafali fiar sidadaun nian ba integridade, transparénsia, efisiénsia, efikásia instituisoins Estadu nian hodi servi ba interese públiku, refere nota komunikadu.

Prezidente Repúblika apela ba Governu no Parlamentu Nasionál atu apoia Komisaun Anti-Korrupsaun, Prokuradória Jerál Repúblika, Polísia Sientífika no Investigasaun Kriminál no Tribunál Rekursu hetan meiu nesesáriu atu kombate korrupsaun ho efetivu, liuhusi atribuisaun Orsamentu Jerál Estadu hodi permite iha rekursu umanu espesializada, tékniku no finanseiru sira, atu susesu iha misaun komplexu ida ne’e iha luta kontra korrupsaun no krime organizadu.

Prezidente Repúblika iha ninia karta ba Parlamentu Nasionál hateten mós; implementasaun lei ne’e atu iha impaktu efetivu no alargadu, tanba lei ne’e rasik presiza fali regulamentasaun komplementár, liuhusi Dekretu-Lei no Dekretu sira seluk,  liuliu relasiona ho área vulneravel sira iha verifikasaun korrupsaun no konflitu interese ninian.

Presiza Lei Komplementár Hodi Apoiu Implementasaun Lei MPCC

Parlamentu Nasionál, iha 20 jullu 2020,  aprova lei MPKK ho unanimidade ho votus 61. (ki)

HAKEREK NO HATÁN

Please enter your comment!
Please enter your name here