Lider Conselho Nacional de Resistência Timorense (CNRT) no Pro-Independénsia, David Dias Ximenes “Mandati” (na-in-rua hosi liman kuana tau oklu) tuur hamutuk ho Xefe UNAMET, Ian Martin, Xanana Gusmão no Sergio Vieira de Mello. Imajen/espesiál.

Milísia sira oho timoroan sira iha Liquiça no iha Suai-Covalima, entaun ha’u duni mak telefone ba Maun Boot Kay Rala Xanana Gusmão iha prizaun Cipinang-Jakarta-Indonézia. Ha’u dehan ba Maun Xanana Gusmão; “Ami subar fali to’o fatuk-ku’ak maibé sira tuir ami nafatin”. Entaun, Maun Xanana Gusmão dehan ba ha’u nune’e; “Imi iha direitu defende aan”. Ne’e maka ami mós tenke tuda-malu ho milísia sira.

DILI, 24 agostu 2020 (TATOLI)—Misaun Organizasaun Nasaun Unida (ONU) ne’ebé hanaran United Nation Mission in East Timur (UNAMET) harii iha loron 11 fulan juñu tinan 1999 hanesan rezultadu hosi akordu 5 de Maiu 1999. Bazea ba akordu ne’e, UNAMET ne’ebé lidera hosi Ian Martin ne’e, fahe atividade referendu tuir faze haat.

Notísia Relevante: DSMTT nia luta ba libertasaun nasionál ne’e luta koletiva

Iha loron 16 jullu-10 agostu 1999 ne’e faze rejistu naran, iha loron 11 agostu-27 agostu 1999 ne’e faze ba pro-independénsia no pro-autonomia sira halo kampaña polítika, iha loron 28 agostu-20 agostu 1999 ne’e perúodu loron hakmatek nian, loron 30 agostu 1999 nu’udar loron Konsulta Populár, loron 31 agostu-06 setembru 1999 ne’e loron ba sura votu nian no maibé tanba membru milísia sira halo violasaun direitus umanus entaun ONU deside anunsia rezultadu votasaun iha 04 setembru 1999 hatudu katak maioria povu Timor-Leste rejeita Pro-Autonomia ho 78.50% (votu; 344.580).

Maibé antes ne’e, grupu milísia pro-atonomia sira hahú halo ona terror no intimidasaun oin-oin ba povu Timor-Leste to’o hamosu Masakre iha Igreja São João de Brito Liquiça iha loron 06 abril 1999 no hafoin anunsia rezultadu votasaun, iha loron 06 setembru mosu masakre setembru negro iha Igreja Ave Maria Suai iha loron 06 setembru 1999.

Tanba milísia sira oho timoroan sira iha Liquiça no iha Sua-Covalima, halo Lider Conselho Nacional de Resistência Timorense (CNRT) no Pro-Independénsia, David Dias Ximenes “Mandati”, tenke telefone no hetan autorizasaun hosi Kay Rala Xanana Gusmão atu bele kontra hasoru milísia sira-nia brutalidade.

Atu hatene kle’an liu, liuliu atu komemorasaun Loron Konsulta Populár ba dala-21 (30 agostu 1999-30 agostu 2020) ne’e, jornalista Agência TATOLI, Evaristo Soares Martins, hala’o entervista ho Lider Conselho Nacional de Resistência Timorense (CNRT) ne’ebé iha 1999 organiza povu iha vila laran liuliu servisu hamutuk ho UNAMET (David Dias Ximenes “Mandati”) iha realizasaun Konsulta Populár, iha resintu parlamentu nasional, segunda (24 agostu 2020).

Oinsá ita-boot sira-nia involvimentu iha prosesu atu hala’o Konsulta Populár iha 1999 hamutuk ho UNAMET?

Iha momentu ne’e situasaun ne’ebé defísil tebes. Maibé, povu rai ida-ne’e organizadu no estruturadu. La’ós iha 1999 tama ba Konsulta Populár ne’e maibé dezde 1975 kedas. Tanba, ita-nia organizasaun polítika hahú hosi nasionál tún ba rejionál, rejionál tún ba zona, zona ba núkelu rezisténsia (Nurep/suku), núkelu rezisténsia ba sélule de kombate (CELCOM/povoação/aldeia) depois to’o uma-kain (fogo).

Komité Ezekutivu Luta Frente Klandestina iha hela apartir de nasionál tún ba rejionál no órgaun diretivu rejionál ba komité ezekutivu zona. Hosi komité zona tún ba Nurep da rezisténsia populár. Hosi rezisténsia populár (Nurep) tún ba Celcom sélule de kombate, sélule kombate maka povoação (xefe aldeia) tún tán ba uma-kain (fogo). Iha tempu ne’ebá Indonézia iha maibé ita-nia estrutura Governu ne’e iha hela.

Ita-boot sira hatene katak ita-nia funu ne’e organizadu no estruturadu. Organizadu ne’e apartir hosi 1975 kedas, iha ai-laran lori mai vila laran. Funu la’o ita mós organiza nafatin. Balun mate. Balun kontinua halo funu. Ne’ebé, la’ós tanba referendu ne’e mak ita organiza. Ita manán funu ho organizasaun.

Nu’udar timoroan saida mak ita-boot sira defende no luta ba povu no rai Timor-Leste nia di’ak?

Ami hakarak ita atu forma estadu, primeiru ita tenke iha rai, segundu ita tenke iha povu no terseiru ita tenke iha organizasaun poítika. Buat tolu ne’e ita iha depois mak ema halo invazaun entaun saida mak ita hakarak. Ita hakarak seguransa ba ita-nia povu, justisa ba ita-nia povu no moris di’ak bai ta-nia povu.

Nu’udar líder ne’ebé reprezenta CNRT mai servisu hamutuk ho líder pro-autonomia iha UNAMET nia mahon, oinsá bainhira foufoun hasoru malu ho líder pro-autonomia no líder UNAMET nian?

Ami ko’alia ba malu. Sira konfia forsa Indonézia nian dehan ho forsa boot. Ita konfia ho forsa povu nian tanba povu forte. Obstákulu ne’e barak tebes tanba ita organiza malu iha militár Indonézia nia leet. Maibé, ami firme nafatin luta to’o ukun rasik aan. Ami kontinua organiza malu maski situasaun defísil tebes.

Ami hasoru obstákulu maibé ami hakarak Liberdade ba ita-nia povu. Ne’e hanesan harga diri, dignidade pesoa umana. Tanba, atu forma estadu ida dignidade idak-idak ninian tau hamutuk sai povu para depois buka moris, ne’e mak ita-nia dignidade. Impresaun iha momenu ne’ebá hanesan ohin ha’u hateten tiha ona, katak ita-nia funu ne’e organizadu no estruturadu, tan ne’e mak ha’u iha garantia ida katak ita manán funu.

Sá motivasaun mak halo ita-boot sira kontinua defende rai ida-ne’e iha situasaun defísil ne’e?

Ami-nia hanoin iha momentu defísil ne’e mak seguransa, justisa no moris di’ak ba ita hotu. Ne’e harga mati. Ita hakarak seguransa ne’e garantidu ba povu tomak tuir lei. Povu tomak tenke hetan justisa ne’ebé ho loloos no povu tenke moris di’ak iha ita-nia independénsia ida-ne’e.

Iha situasaun defísil ne’e simu orientasaun hosi sé?

Orientasaun mai hosi Komandu Supremu da Luta, Komandu Supremu Xanana Gusmão momentu ne’ebá iha kadeia, Xefe Estadu Maiór mak iha-ne’e. Katuas Xanana dehan katak labele baku hasoru milísia sira-ne’ebé duni imi-ne’e, nune’e sira labele foti ida-ne’e hanesan razaun para mantein sira-nia aan, imi subar-aan de’it.

Ho milísia sira-ne’ebé kontinua buka-tuir ita boot sira, iha reasaun hasoru sira?

Maibé komu sira tuir ami nafatin até to’o milísia sira oho ema barak iha Liquiçá no iha Suai ne’ebé hamosu masakre no ohi ema tan iha fatin barak. Entaun, ha’u duni mak telefone ba Maun Boot Kay Rala Xanana Gusmão iha prizaun Cipinang-Jakarta-Indonézia. Ha’u dehan ba Maun Xanana Gusmão; “Ami subar fali to’o fatuk-ku’ak maibé sira tuir ami nafatin”. Entaun, Maun Xanana Gusmão dehan ba ha’u nune’e; “Imi iha direitu defende aan”. Ne’e maka ami mós tenke tuda-malu ho milísia sira.

Tanba ne’e mak ha’u hanoin, ligadu ba ohin loron timoroan hotu-hotu hosi lorosa’e to’o loromonu, hosi tasi-mane to’o tasi-feto, buka mak unidade nasionál. Atu hetan unidade nasionál ita tenke obriga malu halo diálogu. Diferénsa ne’e tenke iha maibé ita tenke hamutuk para dudu ita-nia rai ne’e ba-oin. Ita hamutuk buka seguransa, justisa no moris di’ak. Kuandu to’o moris di’ak atu buka justisa, ita labele husik sosiedade ita-nian ne’e balun moris iha “lalehan” no balun moris iha “taho-laran”. Ha’u-nia apelu mak ne’e de’it.

Oinsá ho diferensa ideia entre pro-independénsia no pro-integrasaun iha momentu ne’ebá?

Diferénsa ne’e iha, sira-nia paradigma “ha’u uluk mak ó”. Ita-nia paradigma “ita hamutuk mak bele”. Ne’e katak, momentu ne’e timoroan hotu-hotu luta tantu direta no indireta.  Diferensa ne’e akontese sira mós hatene katak saida mak independénsia. Indpendénsia ne’e ema-nia direitu ne’ebé ema-ida labele impede, ne’e sira hatene. Maibé komu Indonézia lori fasilidade mai, lori sasán mai entaun sira halai tuir sasán sira-ne’e. Enkuantu ba ita, ita halai tuir ita-nia idealizmu. Iha ne’e mak ita-nia diferensa. Ohin loron, ita-boot bele haree, sira sempre aproveita oportunidade.

Ita-boot iha momentu ne’ebá hanesan líder ka koordenadór ba referendu ne’ebé hamutuk ho Juventude Loriku Aswa’in sira, oinsá kontribuisaun juventude sira-nian?

Juventude maka’as tanba organizasaun polítika ne’e mai hosi 1975 ne’e, sira moris de’it iha organizasaun nia laran. Habelar ita-nia rezisténsia ba povu liuhosi organizasaun no sira barani tebes. La ta’uk mate. Maski juventude mate barak, bele mate maibé kontinua luta nafatin.

Hela de’it loron balun ita selebra loron konsulta populár 30 de agostu ba dala-21. Oinsá ita-boot nia mensajen ba loron konsulta popular ne’e?

Iha loron konsulta populár loloos ne’e ita hotu tuur halo reflesaun. Hafoin Konsulta popular to’o agora tinan 21 ona, saida mak ita halo ba ita-nia povu. Ita-nia povu ne’e moris di’ak duni ka lae. Ka, ita haree sosiedade balun riku no balun kiak. Saida mak uluk ita promete ba ita-nia povu no saida mak agora ita halo ba ita-nia povu. Ida-ne’e mak ha’u hakarak husu ba ita hotu ejize malu ba diálogu. Diferensa ne’e tenke iha mak ita buka saida mak igualdade entre ita.

Jornalista: Evaristo Soares Martins

Editór: Cancio Ximenes

HAKEREK NO HATÁN

Please enter your comment!
Please enter your name here