Primeiru-Ministru, Taur Matan Ruak, prezide reuniaun Konsellu Ministru, iha Palásiu Governu, kuarta (12/08). Imajen Tatoli/Egas Cristovão

DILI, 12 agostu 2020 (TATOLI)-Liuhosi reuniaun Konsellu Ministru (KM) ezekutivu sira halo aprovasaun ba planu rekuperasaun ekonomia ne’ebé mak aprezenta hosi Komisaun Rekuperasaun Ekonómika semana liubá.

Ministru Prezidénsia Konsellu Ministru, Fidelis Manuel Leite Magalhães, hateten medida hirak ne’e komisaun hatuur iha dokumentu rekomendasaun ba Governu, no ezekutivu sira sei avalia no konsidera tiha ona maka lori ba KM atu deside rekomendasaun hirak ne’ebé sira hato’o.

“Planu Rekuperasaun Ekonómika ne’ebé aprezenta medida balun, ho objetivu ba rekuperasaun ekonomia iha pós COVID-19, ne’ebé fahe ona ba área no setór prioritáriu sira,” tenik Ministru Fidelis hafoin ramata reuniaun KM iha Palásiu Governu, kuarta ne’e.

Notísia Relevante: KM Analiza Rekomendasaun Hosi Komisaun Elaborasaun Planu Rekuperasaun Ekonómika

Setór prioritáriu sira hanesan iha agrikultura, turizmu, abitasaun, kapitál umanu (edukasaun, saúde no protesaun sosiál), no iha reforma institusionál.

Planu ne’e propoin hosi Komisaun ba Elaborasaun Planu Rekuperasaun Ekonómika nian, ne’ebé hahú ninia funsaun iha loron 18 juñu 2020, ho misaun fó rekomendasaun ba KM, kona-ba medida sira hodi halo aprovasaun no asaun, hodi ezekuta iha rekuperasaun ekonomia nasionál ninia.

Nune’e, bele define prioridade sira ne’ebé klaru kona-ba investimentu no garantia konsensu posível sosiedade nian ne’ebé boot, iha área prinsipál investimentu nian.

Hafoin aprova planu rekuperasaun ekonomia ne’e, Primeiru-Ministru, Taur Matan Ruak, konvoka reuniaun ho ministériu sira ne’ebé toma konta ba área ekonomia hodi haree setór prioritáriu sira ba rekuperasaun ekonomia.

Membru Governu ne’ebé  partisipa iha enkontru ne’e maka Ministru Koordenadór Asuntu Ekonómiku, Joaquim Amaral, Ministru Turizmu, Komérsiu no Indústria, José Lucas do Carmo da Silva no Ministru Agrikultura no Peska, Pedro dos Reis.

Jornalista: Antónia Gusmão

Editora: Julia Chatarina

 

HAKEREK NO HATÁN

Please enter your comment!
Please enter your name here