Kondisaun hela no toba fatin membru Unidade Patrullamentu Fronteira (UPF) iha Quibiselo no Oesilo, Rejiaun Administrativa Espesiál Oe-Cusse Ambeno (RAEOA) ne’ebé presiza hetan apoiu husi Governu. Imajen/Ministériu Interiór.

DILI, 10 agostu 2020 (TATOLI)- Vise Ministru Interiór, António Armindo hamutuk ho Sekretáriu Estadu Protesaun Sivíl (SEPS), Joaquim José Gusmão, hala’o vizita hodi observa direita kondisaun postu seguransa Unidade Patrullamentu Fronteira (UPF) iha Quibiselo no Oesilo iha Rejiaun Administrativa Espesiál Oecusse Ambeno (RAEOA).

Notísia Relevante : UPF Kontinua Asegura Fronteira iha Kualkér Situasaun

Vise Ministru Interiór, António dehan, liuhusi vizita ne’e nia parte bele haree direita problema báziku ne’ebé UPF hasoru hodi tau kalendáriu orsamentu Estadu hodi buka rezolve problema sira-ne’e.

“Ita nia membru UPF sira enfrenta problema, no hasoru difikuldade ho rekursu ne’ebé limitadu. Imi hatudu nafatin iha espíritu nasionalizmu kumpre imi nia misaun hodi asegura fronteira. Iha fatin ida ne’e rai fuik no ema la hela besik, karik sama ain iha sidade dala ruma de’it,” dehan Armindo liuhusi komunikadu imprensa ne’ebé Agência Tatoli asesu husi Ministériu Interiór, ohin.

Governante ne’e husu ba membru UPF sira atu kontinua servisu nafatin hodi garante seguransa iha fronteira terrestre hodi fó tempu ba Estadu buka rezolve problema sira tuir planu no programa.

“Fatin ida ne’e maka UPF sira tenke defende ho isin lolon, hodi hala’o servisu vijilánsia apoiu operasionál iha liña fronteira hodi salva guarda nasaun nia dignidade. Ha’u hakaruk apresia no orgullu boot tebes ba membru UPF no ita nia liman kro’at nasaun nian F-FDTL ne’ebé iha espíritu boot hodi halo povu rai ketan ida ne’e moris hakmatek,” dehan António iha Postu UPF Quibiselo.

Iha oportunidade ne’e, Vise Ministru António husu ba abitante sira ne’ebé hela iha liña fronteira kontinua koopera ho autoridade seguransa kontrola situasaun seguransa hodi hetan paz.

Membru Governu ne’e promote sei hato’o problema báziku ne’ebé UPF sira enfrenta sei hato’o ba Primeiru-Ministru no Ministru Interiór, Taur Matan Ruak, hodi tau konsiderasaun.

“Ita nia Primeiru-Ministru hakarak hadi’a kondisaun sira hahú husi fronteira uluk mak atu bele rezolve fali postu seguransa sira seluk. Prioridade dahuluk mak harii postu UPF hotu-hotu ho modelu ida de’it, kompletu ho fasilidade mobiliáriu, nesesidade báziku, asesu dalan no eletrisidade. Ita presiza liña koordenasaun ho Ministériu no Instituisaun relevante sira hanesan Obras Públiku, Terras e Propriedade no Ajénsia Dezenvolvimentu Nasional (ADN) hodi finaliza planu hirak ne’e, depois faze tuir mai atu aumenta tan membru UPF tuir planu Governu nian,” nia promete.

Tuir planu, Ministériu Interiór nian sei aumenta tan membru ba kada kompañia husi ALFA, BRAVO CHARLIE iha futuru.

Durante halo vizita, membru Governu ne’e ho komitiva halo mós inaugurasaun ba Gruta Santo António ne’ebé hetan ona bensaun husi padre sira.

Jornalista   : Eugénio Pereira

Editór        : Francisco Simões

HAKEREK NO HATÁN

Please enter your comment!
Please enter your name here