Governu hamutuk ho entidade relevate sira akompaña foos importadu hosi Vietname, ne’ebé atraka ona iha Portu Dili, kinta (13/08). Imajen/MKAE

DILI, 13 agostu 2020 (TATOLI)Akizisaun foos faze dahuluk hosi Vietname tonelada 6.000 atraka ona iha Portu Dili ho ró MV. MY HUNG.

Prezidente Sentru Lojíztika Nasionál (CLN, sigla portugés), Agusto Junior Trindade, informa akizasaun foos hosi Vietname ho kuantidade hamutuk tonelada 30.000, maibé ohin foin to’o balun.

Governu Timor-Leste halo akizisaun foos ho kustu millaun $15, tama iha pakote sosiu-ekonómiku hodi rezerva iha situasaun emerjénsia no garante stock nasionál ba fulan-tolu atubele kompensa bainhira foos menus durante surtu COVID-19.

“Governu sosa foos hosi nasaun Repúblika Sosialita Vietname hamutuk tonelada 30.000. Horiseik ró lori foos tenelada 6.000 to’o iha Portu Dili tuku 11:00 dader, enkuantu tonelada 24.000 sei iha dalan no sei to’o iha Dili iha tempu badak nia-laran,” informa Prezidente CLN, ba Agência Tatoli, via telefónika, kinta ne’e.

Notísia Relevante: KM Delega Kompeténsia ba CLN Selebra Kontratu ho Vietname Sosa Foos Tonelada 30.000

Governu antes ne’e fó kompeténsia ba CLN hodi selebra akordu akizisaun foos ho Governu Vietname.

Dirijente ne’e dehan, foos tonelada 12.500 sei to’o tán iha loron 21 agostu no iha 30 agostu sei to’o tonelada 11.500.

Nia haktuir, ohin parte Governu loke ofisialmente segel foos ne’e rasik no sei hatún foos hosi ró hodi lori ba armajen CLN.

Membru Governu ne’ebé sai sasin ba foos ne’ebé atraka iha portu ne’e maka Ministru Turizmu, Komérsiu no Indústria, José Lucas do Carmo da Silva, Ministru Koordenadór Asuntu Ekonómiku, Joaquim Amaral, no Ministru Transporte no Komunikassaun, José Agustinho da Silva.

Partisipa mós hosi reprezentante Banku Nasionál Komérsiu Timor-Leste (BNCTL, sigla portugés), Programa Ai-han Mundiál (WFP, sigla inglés), Autoridade Inspesaun Fiskalizasaun Atividade Ekonomia Sanitária (AIFAESA), no Polísia.

Hafoin observa foos, Ministru Joaquim, dehan ohin Governu mai sai sasin ba foos ne’ebé sosa hosi Vietname iha tempu krize pandemia COVID-19.

“Iha momentu ne’ebá, nasaun hotu defísil atu fa’an foos, maibé ho esforsu ne’ebé Governu iha konsege halo negosiasaun ho Governu Vietname atu sosa foos importasaun atubele asegura ita-nia stock nasionál,” subliña governante ne’e.

Foos importasaun ne’e sei fa’an ho presu baratu ba komunidade ho objetivu atu normaliza presu iha merkadu.

Foos sei transporta ba armajen CLN iha Tibar

Prezidente CLN, Agusto Junior, informa kona-ba hatún foos hosi ró ba armajen CLN iha Tibar, sei halo kontratu ho kompañia lokál sira hodi tula.

“Agora ami sei diskute termu kontratu, orsida iha konkordánsia ona mak foin bele transporta,” nia akresenta.

CLN mós koopera ho AIFAESA hodi halo inspesaun no foti sampel foos atu hatene kualidade foos importadu, molok lori ba armajen.

Iha sorin seluk, Prezidente Autoridade Portuáriu Timor-Leste (APORTIL), Flávio Cardoso Neves, hateten ró ne’ebé tula foos akizisaun hosi Vietname to’o ona iha Portu Dili horiseik no ró rua sei tuirmai iha tempu badak.

“Ohin Ministru tolu hetan akompañamentu mós hosi APORTIL no Alfándega hodi halo abertura ba distribuisaun foos. APORTIL preparadu atubele koordena nafatin, nune’e bainhira foos ne’e mai bele fasilita foos hosi Portu Dili trasporta to’o armajen CLN rasik,” nia haktuir.

Ekipa ne’ebé envolve atu halo kontrolu ba foos maka APORTIL, Alfándega, imigrasaun, kuarentena no saúde atu fó garantia ba ema ne’ebé lori foos tama mai oinsá atubele halo dizinfekta.

“Ró tama, iha ekipa saúde destaka iha klínika saúde Portu Dili nian, sira maka haree ba ema no sasán ne’ebé tama hodi bele prevene moras COVID-19,” nia akresenta.

Autoridade portuáriu ne’e haktuir, bainhira ró atraka iha Portu Dili, ema sira ne’ebé maihosi Vietname iha de’it ró laran.

“Ita la autoriza sira atu sai mai li’ur. Sira iha ró laran de’it tanba ita mós labele halo kontaktu ho sira. Ita iha ajénsia ne’ebé Governu kontrata atu toma konta hatún foos sira hosi ró laran mai iha rai maran,” nia subliña.

Jornalista: Natalino Costa

Editora: Julia Chatarina

HAKEREK NO HATÁN

Please enter your comment!
Please enter your name here