Membru FALINTIL feto sira kaer kilita funu hasoru invazór. Imajen/Google.

DILI, 20 agostu 2020 (TATOLI)- Veteranu FALINTIL marak mak sei ativa servisu iha vida militár hanesan membru FALINTIL-Forsa Defeza Timor-Leste (F-FDTL) no barak mós mak reforma ona ba vida sivíl.

Notísia Relevante : PR Lú Olo husu CCLN identifika no buka solusaun ba veteranu falsu

Husi sira-lubun ne’ebé fila ba vida sivíl, moris iha situasaun susar no mukit tebes. at liután, balun la iha hela-fatin no moris difisil tebes iha faze ukun rasik-an ne’e.

Xefe Estadu Maiór FALINTIL-Forsa Defeza Timor-Leste (F-FDTL), Majór Jenerál Lere Anan Timur. Imajen/Egas Cristovão

Tuir Xefe Estadu Maiór Jenerál F-FDTL, Majór Jenerál Lere Anan Timor, informa katak, problema ne’ebé veteranu rezisténsia sira hasoru, tanba falta atensaun husi Estadu, liu-liu lider polítiku ka fundadór nasaun sira ne’ebé moris fahe malu iha vida polítika too hamosu inserteza polítika iha rai laran.

Nia husu ba Estadu no Governu halo lei atu garante veteranu sira-nia futuru, no sira-nia oan no bei-oan sira hetan direitu no regalia tanba aman-inan sira-nia kontribuisaun boot ba libertasaun nasionál.

Lere husu mós ba Estadu Timor-Leste, kada tinan tenke tau iha programa Orsamentu Jerál Estadu (OJE) iha nafatin fundus atu harii veteranu sira-nia uma ka hela fatin ne’ebé dignu.

“Veteranu FALINTIL sira ne’ebé ohin loron sei ativu iha F-FDTL laran la kontente ho moris ne’e, tanba la iha justisa kona-ba sira nia estatutu no direitu ne’ebé sira merese,” hateten Lere Anan Timur.

Nia lia tun tan dehan, veteranu FALINTIL sira ne’ebé uluk funu tinan 24 nia laran ba Timor nia independénsia, sira-nia estatutu no tratamentu hanesan funsionáriu públiku baibain de’it. No situasaun sai aat liu, bainhira sira ba reforma, tanba ema la tau matan ba sira.

“Ita haluha sira-nia esforsu no sakrifísiu harii nasaun no Estadu ida ne’e,” dehan Lere Anan Timur liuhusi diskursu iha selebrasaun loron FALINTIL ba dala-45 ne’ebé hala’o iha Kuartél Jenerál F-FDTL, Fatuhada, Dili, ohin.

Nia dehan, Forsas Armadas, loloos tenke iha estatutu espesiál ida ho nia natureza militár duni, ketak no labele kompara. Tanba bainhira ko’alia kona-ba osan operasionál ka perdiem, funsionáriu públiku sira hetan $40,00, maibé soldadu F-FDTL sira hetan $10,00 de’it, ne’e la iha ekilíbriu.

Komandante Lere hatutan, veteranu sira ne’ebé to’o ohin loron sei servisu iha Instituisaun F-FDTL, bainhira konta loloos, sira halo ona tinan-44 serbí Estadu, tinan 24 iha funu rezisténsia nia-laran no tinan 20 iha tempu independénsia nian.

“Dala balu ho impase polítiku ida ne’e polítiku sira, liu-liu na’i-ulun sira taka matan ba problema sira ne’e. Se ohin loron nasaun ne’e estavel, ne’e tanba kontribuisaun boot husi líderes istóriku sira hamutuk ho veteranu FALINTIL sira,” dehan Lare.

Iha parte seluk, Lere dehan, ohin loron ema balu hakarak iha mós istória no inventa istória. Sira dehan katak ukun-an ne’e hahú husi (pregu) konsulta populár, no sira nega prosesu tomak ne’ebé la’o molok konsulta populár. FRETILIN no FALINTIL ne’e patrimóniu Estadu nian ne’ebé labele husik malu. Ohin loron FRETILIN partidu polítiku ida, maibé FRETILIN uluk, nia mak matadalan no komanda FALINTIL hodi funu no reziste hasoru invazora sira ba libertasaun nasionál. Sobrevivente sira ne’ebé uluk komanda funu mak Kay Rala Xanana Gusmão, Mauhunu Bulerek Karatayanu.

Nia hatutan, FRETELIN no FALINTIL mak la iha karik, Referendu mós la iha no independénsia mós la iha.

“Ita tenke rekoñese katak uluk FRETILIN mak matadalan no FALINTIL mak liman kro’at FRETILIN no povu Maubere nian. Ikus mai CNRT moris nu’udar produtu Unidade Nasionál no despartidarizasaun FALINTIL nian no lori Timor-Oan sira ba Referendu.”

Lere tatoli ho espera katak, liuhusi desizaun Estadu  hodi harii ona Konsellu Nasionál Veteranu no Ministériu ba Veteranu. Instituisaun rua-ne’e Estadu fó responsabilidade atu identifika problema sira hotu ne’ebé mosu hodi fó solusaun.

Komandante F-FDTL ne’e mós husu ba jerasaun futuru Timor-Leste sira atu buka dalan oinsá atu ema labele nega no labele hamoos istória. Dalan di’ak liu mak habelar istória ne’e ba jerasaun foun sira liuhusi dalan edukasaun sívika, hahú husi eskola sira, edukasaun polítiku, instituisaun Estadu no seluk tan, atu nune’e, sidadaun hot-hotu bele hatene istória ne’e nu’udar TL nia identidade rasik.

Komandu F-FDTL mós rekomenda ba Estadu no Governu, atu loron 20 agostu sai loron nasionál.

Iha parte seluk, Veteranu rezisténsia, Alin Laek husu ba Estadu Timor-Leste atu tau matan no halo uma ba veteranu tinan-24 barak ne’ebé reformadu ona iha Instituisaun F-FDTL fila ba vida sivíl barak moris uma la iha, Estadu tenke kria polítika para halo uma ba sira.

“Problema veteranu ne’e ita haree barak tebes, balun ate agora uma la iha, ida ne’e presiza hetan atensaun husi Estadu para halo uma ba sira, tanba sira fó ona kontribuisaun boot ba luta libertasaun nasionál,” Alin Laek hateten.

Nia hatutan, sira nia parte sei ajuda Governu ne’e hodi rezolve mós problema veteranu nian barak ne’ebé sei pendente, inklui veteranu falsu sira ne’ebé simu ona osan Estadu atu identifika hodi hakotu problema veteranu nian.

Jornalista   : Eugénio Pereira

Editór        : Francisco Simões

HAKEREK NO HATÁN

Please enter your comment!
Please enter your name here