Prezidente Repúblika, Francisco Guterres Lú Olo. Imajen António Gonçalves

DILI, 20 agostu 2020 (TATOLI) Prezidente-Repúblika, Francisco Guterres “Lú Olo”, husu Konsellu Kombatentes Libertasaun Nasionál (CCLN-sigla portugés) atu identifika no buka solusaun ba dadus falsu veteranu nian.

“Iha oportunidade ida-ne’e, ha’u apela ba Konsellu Kombatentes Libertasaun Nasionál, ida-ne’ebé harii hodi defende interese Kombatente sira-nian, atu identifika no buka solusaun hodi hadi’ak dadus lubuk ida  ne’ebé sei pendente hela, inklui dadus kona-ba veteranu falsu sira,” Xefe Estadu hato’o mensajen iha ámbiru selebrasaun FALINTIL ba dala-45, iha Kuartél Jenerál, Fatuhada, Dili, kinta ne’e.

Prezidente Repúblika, Francisco Guterres “Lú Olo’, konsidera meiu ida-ne’e mak bele fó onra loloos ba Eróis  da Pátria.

“Só ita rekoñese uluk veteranu sira hafoin ita valoriza sira. Importante mak halo saída mak tenki halo hamutuk ho Ministériu ba Asuntus Kombatentes Libertasaun Nasional,” Xefe Estadu hateten. 

Mensajen ne’e Xefe Estaadu apela ba veteranu no kombatente sira-ne’ebé sei moris atu kontinua tatoli imi-nia istória rasik ba imi-nia oan no família sira no ba Povu tomak hodi hatutan ba jerasaun tuir mai.

Xefe Estadu mós dehan, tempu to’o ona atu prezerva istória loloos ba jerasaun sira tuir mai tanba istória loloos mak sei sai abut no valór ne’ebé metin ba jerasaun sira tuir mai.

Ho nune’e, Xefe Estadu husu nafatin ba Governu atu kolabora no halibur dadus hosi kombatente, organizasaun rezisténsia no ema hotu atu fó apoiu ba ekipa ka organizasaun sira hanesan Komité Orientador 25, Komisaun Peskiza no Elaborasaun Istória Luta Feto Timor,  Sentru Audiovisual Max Stahl, Centro Nacional Chega, Arkivu no Muzeu Resizténsia no organizasaun seluk tan, ne’ebé hahú rejista no hakerek daudaun istória kona-ba papél organizasaun resisténsia ka organizasaun juventude ka feto nian iha prosesu luta libertasaun nasionál.

Istória ne’ebé tuir faktus mak sei fó valór loloos ba sakrifísiu tomak hosi Aswa’in sira ba Pátria ida-ne’ebé sei hamoris Patriotizmu no Nasionalizmu no ba jerasaun sira tuir mai atu kaer-metin valór solidariedade, espíritu sakrifísiu, kreativu no fó-aan tomak ba Povu no Nasaun,” nia dehan. 

Nia mós husu ba joven sira atu labele baruk hodi aprende no banati tuir saída mak Aswa’in FALINTIL sira hatudu iha tinan rua nulu resin haat nia laran tanba FALINTIL sira sakrifika sira-nia aan totál ba Pátria no agora.

Jovem sira, imi-nia tempu atu kontinua hatutan sakrifisiu Aswa’in FALINTIL ho estuda maka’as, badinas no ajuda malu hodi dezenvolve rai doben Timor-Leste. Tanba imi joven sira mak sei sai Aswa’in foun ba dezenvolvimentu nian,” nia tatoli

Tanba, Xefe Estadu ne’e hateten, nia fiar katak ho istória loloos de’it mak Timor-Leste nia jerasaun tuir mai sei iha orgullu atu konta no hakerek nafatin kona-ba Glorioza FALINTIL nia istória ho letra osan-mean. 

Notísia Relevante: Estadu iha dever valoriza veteranu FALINTIL sira

Jornalista : Evaristo Soares Martins

Editór       :  Cancio Ximenes

HAKEREK NO HATÁN

Please enter your comment!
Please enter your name here