Prezidente Repúblika, Francisco Guterres Lú Olo halo inspesaun parada ba Loron Aniversariu FALINTIL-FDTL ba dala 45 iha kuartel jerál Fatuhada, (20/08). Imajen/Egas Cristovão

DILI, 20 agostu 2020 (TATOLI)—Prezidente Repúblika, Francisco Guterres “Lú Olo”, hateten estadu iha dever atu valoriza veteranu FALINTIL sira.

Xefe Estadu esplika, artigu 11 hosi Konstituisaun RDTL rekoñese no fó valór ba Povu Maubere nia rezisténsia sekulár hasoru rai-seluk nia dominasaun no ba sira hotu ne’ebé luta ba independénsia nasionál.

Nune’e, iha tinan kotuk, ho Estadu nia naran, Prezidente Repúblika kondekora Aswa’in FALINTIL hamutuk sia nulu resin sia (99) ne’ebé dedika sira-nia aan ba funu libertasaun nasionál durante tinan tinan rua nulu resin haat, tuituir malu.

Hosi Asua’in hirak ne’e,  balun mate iha kampu batalla, no sira ne’ebé sei moris,  barak mak katuas no ferik ona, balun sei moris mukit hela no la’ós saudável.

“Ho nune’e,  Estadu tenke buka tau matan ba sira atu sira mós bele moris ho dignidade. Labele husik ba aban todan ne’ebé sira lori hela to’o ohin loron, iha ita-nia Timor-Leste livre no independente. Kada tinan Governu aloka orsamentu ba  veteranu no kombantente sira ho valór dólar Amerikanu liu millaun ualu nulu resin lima.  Ita bele  buka dadaun alternativa seluk hodi halo osan ne’e buras atu bele sustenta família veteranu no kombatente sira-nian iha futuru,” Xefe Estadu hato’o mensajen iha ámbiru selebrasaun tinan 45, iha Kuartél Jenerál, Fatuhada, Dili, kinta ne’e.

Iha sorin seluk, Xefe Estadu dehan, polítika VIII Governu atu fó omenajém ba sira hotu ne’ebé mate iha territóriu laran tomak, liuhosi planu atu harii monumentu iha kada Postu Adminstrativu, tenke haree mós ba iha valor kultura ne’ebé iha no importante liu mak fahe informasaun ba veteranu no kombatente sira hodi hasees dúvidas hosi veteranu no kombatente sira-nia família no iha ita-nia sosiedade.

“Ha’u fiar katak Governu ida ne’e sei fó atensaun lalais hodi tulun nafatin kombatente sira,” Xefe Estadu ne’e hateten.

Notísia Relevante: Espíritu FALINTIL lori nasaun ba prósperiedade

Jornalista : Evaristo Soares Martins

Editór        :  Cancio Ximenes

HAKEREK NO HATÁN

Please enter your comment!
Please enter your name here