Prezidente Repúblika, Francisco Guterres Lú Olo. Imajen/ Egas Cristovao

DILI, 20 agostu 2020 (TATOLI)—Prezidente Repúblika, Francisco Guterres “Lú Olo”, hateten espíritu Forsa Libertasaun Nasionál Timor-Leste (FALINTIL) sei fó inspirasaun ba timoroan hodi lori nasaun ba prosperiedade.

“Ohin, espíritu FALINTIL sei fó inspirasaun, kbiit no determinasaun atu ita hotu lao ba oin hamutuk nafatin to’o hetan dezenvolvimentu sosiál no moris-di’ak ba Povu tomak, hodi hametin fiar no domin ba ita-nia aan rasik, ba sosiedade no nasaun tomak, hanesan saída mak Aswa’in FALINTIL sira halo ona durante tinan rua nulu resin haat hodi kore povu hosi invazór sira-nia ukun,” mensajen Xefe Estadu nian iha ámbiru selebrasaun tinan 45, iha Kuartél Jenerál, Fatuhada, Dili, kinta ne’e.

Xefe Estadu hateten, demokrasia no liberdade hanesan konkista boot ida hosi FALINTIL, ein-partikulár, hosi povu, no jerál.

Xefe Estadu haktuir, iha tinan sanulu resin ualu (18) harii no konsolida Nasaun Timor-Leste tuir prinsípiu Estadu Direitu Demokrátiku no tuir Konstituisaun RDTL, nune’e mós hatuur ona Órgaun Estadu ida-idak ho ninia kompeténsia rasik no labele interfere ba malu.

“Prinsípiu ida-ne’e mak ha’u halo no kumpre durante ne’e, maski iha situasaun polítika ne’ebé hamosu dúvida hosi polítiku-na’in balun ba Órgaun Estadu tomak maibé ita-nia veteranu, kombatente, joven no Povu tomak kontinua tau konfiansa ba Órgaun Estadu nian. Ho orgullu, ha’u saúda maturidade Povu Aswa’in Timor-Leste no veteranu FALINTIL iha loron ohin,” Xefe Estadu ne’e hateten.

Estadu tenke ezerse ninia podér nu’udar entidade públika atu proteje no defende sidadaun sira-nia direitu. Sidadaun sira tenke iha konxiénsia katak hotu-hotu, nu’udar sidadaun, iha direitu maibé iha mós responsabilidades no devér.

Liberdade lao hamutuk ho responsabilidade, nune’e, sidadaun ida ne’ebé livre iha responsabilidade ba ema seluk, ba Povu tomak no ba Estadu. Ho de’it dalan ida-ne’e mak ita bele afirma katak ‘Ho espíritu FALINTIL nian, ha’u prontu no desididu atu servi Povu no Nasaun nia interese’.

“Iha fatin ida ne’e, ha’u kontinua repete tan katak ha’u sei hala’o ha’u-nia funsaun hotu nu’udar Komandante Supremu Forsa Armada no Prezidente Repúblika ba Povu tomak no hakru’uk de’it ba Konstituisaun RDTL,” Xefe Estadu afirma.

Hanesan Komandante Supremu Forsa Armadas nian,  hakarak afirma mós katak,  artigu 87 alínea d) hosi Konstituisaun RDTL fó kompeténsia ba Prezidente Repúblika servisu ho Governu no  kondús prosesu negosiasaun kona-ba akordu internasionál sira iha área Defeza no Seguransa.

Liuhosi akordu sira-ne’e, ita tau atensaun ba planu atividade ne’ebé besik ba diplomasia defezaho objetivu atu apoia forsa defeza no seguransa hodi bele kontribui ho di’ak ba polítika esterna.

Xefe Estadu subliña, valór sira-ne’ebé Asua’in FALINTIL husik mai ita mak serví onestu atu kore Povu ida-ne’e hosi mukit nia laran. FALINTIL, tuir nia naran rasik hateten, harii hodi liberta ita-nia rai hosi okupasaun estranjeira, ho objetivu politíku atu manán funu hasoru invazor.

“Klaru, la fásil atu atinje mehi ida-ne’e maibé liuhosi servisu hamutuk ho ita-nia Povu, sai duni realidade. Tanba ne’e mak ita dehan beibeik katak FALINTIL mak ikan, Povu hanesan bee,” Xefe Estadu hateten.

Jornalista : Evaristo Soares Martins

Editór       :  Cancio Ximenes

HAKEREK NO HATÁN

Please enter your comment!
Please enter your name here