Estrutura no funsionáriu Agência Tatoli. Imajen Tatoli/António Gonçalves

DILI, 19 agostu 2020 (TATOLI)-Relasiona ho resignasaun Prezidente Konsellu Diretivu Agência Tatoli, Institutu Públiku (IP), José da Costa, Sekretáriu Estadu Komunikasaun Sosiál, Merício Juvinal dos Reis ‘Akara’ hato’o ona karta ba Ministru Asuntu Parlamentár no Komunikasaun, Francisco Jerónimo, hodi propoin kandidatu hosi internál ajénsia Estadu ne’e substitui atuál prezidente.

“SEKOMS propoin kandidatu balun ne’ebé maihosi internál Tatoli rasik ho razaun profisionalismu, esperiénsia no konsidera iha memoria  institusionál atu asume kargu Prezidente Tatoli foun hodi substitui  atuál Prezidente Tatoli, José da Costa, ne’ebé hatama ona nia karta resignasaun iha loron 4 agostu 2020,” refere nota hosi Gabinete SEKOMS, ne’ebé Agência Tatoli asesu iha kuarta ne’e.

Notísia Relevante: MAPKOMS simu karta rezignasaun Prezidente Agência Tatoli,IP

Bazeia ba despaisu númeru 1/MAPKOMS/VII/2020 kona-ba delegasaun kompeténsia ba SEKOMS, iha pontu balun ne’ebé temi katak SEKOMS iha kompeténsia propoin ba MAPKOMS, medida hirak ne’ebé konsidera importante atu regula setór komunikasaun sosiál, inklui propoin nomeasaun ne’ebé lei haruka iha setór komunikasaun sosiál nian.

“Tanba ne’e SEKOMS hala’o nia knaar tuir de’it delegasaun kompeténsia refere no desizaun finál kompete ba MAPKOMS,” subliña nota imprensa ne’e.

Antes ne’e, Ministru Francisco, dehan maski simu ona karta resignasaun hosi Prezidente Agência Tatoli, maibé seidauk fihir ema ruma hodi okupa kargu ne’e.

Enkuantu José da Costa sei asume knaar nu’udar Prezidente ajénsia notisioza Timor-Leste, to’o loron 30 agostu tinan ne’e.

Jornalista: Natalino Costa

Editora: Julia Chatarina

HAKEREK NO HATÁN

Please enter your comment!
Please enter your name here