Prezidente Agência Tatoli, IP, José da Costa. Imajen Tatoli/Egas Cristóvão

DILI, 04 agostu 2020 (TATOLI)Prezidente Konsellu Diretivu Agência Tatoli, Institutu Públiku (IP), José da Costa, submete ona karta rezignasaun iha segunda (03/08), ba Ministériu Asuntu Parlamentár no Komunikasaun Sosiál (MAPKOMS), ne’ebé Ajénsia Notisioza Timor-Leste ne’e tutela ba.

Ministru Asuntu Parlamentár no Komunikasaun Sosiál, Francisco Martins da Costa Pereira Jerónimo, konfirma katak nia parte simu ona karta ofisiál hosi Prezidente Agência Tatoli.

“Ha’u atu hateten katak Prezidente Tatoli mai ko’alia verbál no husu atu kompriende ninia situasaun, nia hato’o ona karta ofisiál ida maibé ha’u sei haree desizaun saida maka atu foti. Karta ne’e, nia rasik mak aprezenta ho kontiúdu katak husu rezigna-an hosi kargu Prezidente,” hateten Ministru Francisco iha edifísiu Ministériu Finansa, Aitarak-Laran, tersa ne’e.

Notísia Relevante: José da Costa Simu Pose Nu’udar Prezidente TATOLI, IP

Tuir governante ne’e, maski simu ona karta maibé sei fó tempu ba Dirijente mídia Estadu ne’e atu serbisu to’o loron 30 agostu tinan ne’e.

Maski nune’e, to’o agora Ministru rasik seidauk fihir ema ruma hodi okupa kargu Prezidente Agência Tatoli.

“Ha’u seidauk iha kandidatu ruma iha ha’u-nia oin, ha’u sei buka hela maibé atu dehan katak ha’u kompriende Prezidente Tatoli nia hakarak tanba nia hateten ba ha’u buat lubuk ida katak atu troka nia tenke haree ema ne’ebé maka iha esperiénsia iha área mídia atu nune’e bele tur fali iha fatin ne’ebé nia husik hela,” nia akresenta.

Ministru dehan, nia parte sei haree filafali ba baze legál ne’ebé ko’alia kona-ba dezignasaun Dirijente Agência Tatoli.

“Ha’u sei haree tiha lai dekretu-lei sira ne’ebé ko’alia kona-ba rezignasaun ba Prezidente no Vise-Prezidente sira, hafoin maka ha’u foti desizaun ne’ebé mak di’ak tuir lei,” nia subliña.

Ba kestaun ne’e, Prezidente Agência Tatoli, José da Costa, klarifika katak karta rezignasaun ne’ebé mak nia submete ba MAPKOMS maihosi ninia inisiativa rasik.

“Kona-ba hau-nia rezignasaun, ha’u rezigna-an ho konsiénsia rasik hafoin akompaña dinámika polítika ne’ebé la’o daudaun iha ita-nia rain, ne’ebé oituan ka barak implika ba serbisu, ba konfiansa no apoiu polítiku hosi membru Governu ba instituisaun tutela hanesan Tatoli,” dehan José da Costa.

Nia rekoñese, ho mudansa polítika ne’ebé iha bele iha ezonerasaun.

“Ha’u konsiente katak prosesu ezonerasaun ba ha’u bele akontese bainhira de’it, tamba agora daudaun prosesu ezonerasaun akontese iha fatin-fatin no ha’u sente katak desizaun ne’ebé justu no dignu ba ha’u mak hili dalan hodi rezigna-an antisipadamente, hafoin bele fó biban ba prosesu ezonerasaun no nomeasaun ba Prezidente foun Konsellu Diretivu nian tuir lei haruka,” nia subliña.

Biban ne’e, Prezidente mídia estatál ne’e hato’o nia agradesimentu kle’an ba konfiansa durante tinan-ida ho balun.

Nia iha konviksaun boot katak Agência Tatoli iha futuru sei sai di’ak liután no deseja susesu ba ekipa ne’ebé serbisu iha mídia online ne’e.

Iha loron 5 dezembru 2018, José da Costa nomeadu nu’udar Prezidente Konsellu Diretivu Ajénsia Notisioza Timor-Leste, Tatoli ba mandatu tinan-haat liuhosi desizaun Konsellu Ministru.

Proposta nomeasaun ne’e aprezenta hosi Sekretáriu Estadu Komunikasaun Sosiál, Merício Juvinal dos Reis ‘Akara’.

Prezidente Agência Tatoli simu pose iha 21 dezembru 2018 no hala’o serbisu loloos iha inísiu janeiru 2019 to’o agora.

Jornalista: Antónia Gusmão

Editora: Julia Chatarina

HAKEREK NO HATÁN

Please enter your comment!
Please enter your name here