Primeiru-Ministru, Taur Matan Ruak prezide Reuniaun kona-ba Assuntus Petróleo no Minerais iha âmbito ba Debate Preoridades OGE 2020 & 2021. iha Palásiu Governu, Tersa (19/08). Imajen/Egas Cristovão

DILI, 19 agostu 2020 (TATOLI)-Primeiru-Ministru Taur Matan Ruak, konvoka reuniaun ho Ministru Petróleu no Minerál, Víctor da Conceição Soares ne’ebé aprezenta dirijente foun hanesan Prezidente Autoridade Nasionál Petróleu no Minerál (ANPM), Florentino Soares Ferreira, Prezidente Konsellu Administrasaun Timor GAP, António José Loiola de Sousa, no Prezidente Institutu Petróleu no Jeolojia (IPG, sigla portugés), Gabriel Aparício, ne’ebé foin asume knaar.

Iha oportunidade ne’e, Xefe Governu apresia kapasidade profisionál líder foun instituisaun sira iha área petróleu ne’e, ne’ebé bele apoia Governu dezenvolve indústria petrolífera.

“Primeiru-Ministru kontente no apresia líder foun, tanba mai ho karteira profesionál no iha ona esperiénsia traballu iha tinan naruk nia-laran,” tenik Ministru Víctor, akompañadu ho líder foun sira hafoin enkontru ho PM Taur, iha Pálasiu Governu, kuarta ne’e.

Notísia Relevante: Governu Ezonera Francisco Monteiro no Nomeia António José ba Prezidente KA Timor Gap

Governu Nomea Florentino Ferreira Nu’udar Prezidente Konsellu Diretivu ANPM Foun

Ho esperiénsia ne’ebé líder foun sira iha, PM otimista sira bele koopera ho Governu hodi foti desizaun, atubele mellora indústria no investimentu petrolífera iha Timor-Leste.

Prezidente Timor Gap, António José Loiola de Sousa. Imajen Tatoli/Egas Cristvão

“Sira mai atu investe konfiasa institutionál, liuliu konfiansa polítika Governu no parseiru dezenvolvimentu iha indústria petrolífera,” nia akresenta.

Ekipa ne’ebé lidera hosi Ministru Víctor, atualiza mós situasaun no atividade autónomu sira.

“Bázikamente mai atu halo atualizasaun no líder foun sira ne’e mai atu aprezenta sira-nia an ba Primeiru-Ministru katak foin mak simu resposabilidade,” nia haktuir.

Prezidente ANPM, Florentino Mateus Soares Ferreira. Imajen Tatoli/Egas Cristovão

Kona-ba prioridade Orsamentu Jerál Estadu (OJE) 2020 no 2021 iha área petrolífera, tuir Ministru, programa ne’ebé projeta ba 2021 iha diferensa oituan.

Prezidente IPG, sigla portugés, Gabriel Aparício. Imajen Tatoli/Egas Cristovão

“Maibé kontinua nafatin ho ekilíbru no aumenta de’it oituan. Orsamentu tetu fiskál OJE 2020 nia, Ministériu Petróleu no Minerál (MPM) propoin ona millaun $23 tanba ba ezekusaun fulan-rua de’it, enkuantu orsamentu 2021 propoin millaun $37 ba MPM inklui instituisaun autónomu sira, maibé ba prioridade sira sei diskute hela,” nia subliña.

Reuniaun ne’e partisipa mós hosi Ministru Prezidénsia Konsellu Ministru, Fidelis Manuel Leite Magalhães no Ministru Asuntu Parlamentár no Komunikasaun Sosiál, Francisco Martins da Costa Pereira Jerónimo.

Jornalista: Florêncio Miranda Ximenes

Editora: Julia Chatarina

HAKEREK NO HATÁN

Please enter your comment!
Please enter your name here