Primeiru-Ministru, Taur Matan Ruak prezide reuniaun Konsellu Ministru iha Palásiu Governu, kuarta (29/07). Imajen Tatoli/Egas Cristovão

DILI, 29 jullu 2020 (TATOLI) – Governu liuhosi reuniaun Konsellu Ministru (KM), kuarta ne’e aprova nomeasaun ba Florentino Mateus Soares Ferreira ba kargu Prezidente Konsellu Diretivu Autoridade Nasionál Petróleu no Minerál (ANPM) ba mandatu tinan haat.

Mandatu Prezidente ANPM sesante, Gualdino do Carmo da Silva, ramata ona iha loron 30 juñu 2020, nune’e Governu deside la estende mandatu ne’e hodi nomeia prezidente foun.

“ANPM atua hanesan instituisaun reguladora ba setór sira no indústria petróleu no rekursu minerál,” relata Ministru Prezidénsia Konsellu Ministru, Fidelis Manuel Leite Magalhães hafoin ramata reuniaun KM, iha Palásiu Governu.

Prezidente Konsellu Diretivu ANPM, Florentino Mateus Soares Ferreira. Imajen/Espesiál

Iha outubru 2019 to’o agora, Florentino Ferreira nu’udar Diretór Komersiál no Konformidade iha Timor Resources.

Antes ne’e, iha outubru 2016 to’o outubru 2019, nia hanesan Diretór Joint Petroleum Development Area (JPDA).

Nia konsege integra iha ekipa negosiasaun Tratadu Fronteira Marítima ho Austrália hamutuk ho Prezidente sesante Gualdino ho ekipa ne’ebé lidera hosi Xefe Negosiadór Prinsipál ba Asuntu Fronteira Marítima, Kay Rala Xanana Gusmão no eis Ministru Prezidénsia Konsellu Ministru, Agio Pereira.

Jornalista: Antónia Gusmão

Editora: Julia Chatarina

HAKEREK NO HATÁN

Please enter your comment!
Please enter your name here