DILI, 19 agostu 2020 (TATOLI)-Autoridade Nasionál Petróleu no Minerál (ANPM) hahú analiza proposta empreza Santos Limited, kona-ba investimentu petrolífera fura mina-matan tolu iha kampu Bayu-udan.
Tuir Prezidente ANPM, Florentino Soares Ferreira, bainhira empeza ida submete proposta investimentu ba fura mina-matan iha Bayu-undan, presiza analiza aspetu komersiál no tékniku tanba kampu petrolífera ne’e tama ona ba produsaun nia rohan.
“Ein prensípiu, kampu ida bainhira tama ona ba fim de produsaun, ita presiza foti desizaun ida ho kuidadu. Entaun ami halo analiza, estudu no avaliasaun tomak ba parte komersiál no téknika atubele foti desizaun ida di’ak, nune’e la halo lakon Estadu maibé foti desizaun ne’ebé bele fó reseita ka bele atraza kampu (Bayu-undan) ne’e nia tempu produsaun,” tenik Prezidente ANPM, iha Palásiu Governu, kuarta ne’e.
Notísia Relevante: MPM apoia Santos fura mina-matan tolu iha Bayu-undan
Nia dehan, sei iha diskusaun ho empreza Santos molok aprova proposta investimentu.
“Daudaun ne’e, ami-nia parte tékniku haree ba estudu rezerva sira, katak pedidu hosi Santos ne’e pertinente ka lae, ne’ebé ami sei sujeita ba estudu sira. Ami-nia estudu termina tiha mak ami bele foti desizaun hodi refleta duni no fó vantajen ba Estadu,” nia akresenta.
Florentino garante, desizaun ne’ebé foti sei favorese ba Estadu
Nia esplika, daudaun ne’e Governu adopta rejime rekuperasaun, katak iha atividade produsaun empreza hasai osan rasik, maibé Estadu sei rekupera filafali ninia kustu hafoin hetan rendimentu.
“Ita adopta rejime rekuperasaun katak ita sei rekupera empreza nia despeza, tanba ne’e diskusaun sira, ami haree liu ba parte ne’e,” nia subliña.
Tuir previzaun, kustu ba perfurasaun mina-matan tolu iha Bayu-undan hamutuk millaun $200-resin.
Jerente Santos informa ona katak bainhira investimentu ne’e aprova hosi ANPM, maka empreza bele hanaruk tempu produsaun mina iha kampu Bayu-undan maizumenus tinan-ida tan.
Santos nu’udar operadór foun Bayu-undan, ne’ebé sosa partisipasaun Conochophilips, akumula porsentu 60-resin no mós sai operadór iha kampu petrolífera ne’e.
Iha loron 28 maiu 2020, Conocophillips finaliza ona prosesu fa’an ativu petrolífera ba empreza petrolífera australiana, Santos Limited, ne’ebé lokaliza iha Norte Austrália
Durante ne’e, projetu Bayu-undan kontribui ona reseita ba Estadu Timor-Leste, ba fundu mina-rai hamutuk biliaun $20 resin.
Jornalista: Florêncio Miranda Ximenes
Editora: Julia Chatarina
