Atividade iha kampu petrolífera, Bayu-undan. Imajen/Espesiál

DILI, 17 agostu 2020 (TATOLI)Ministériu Petróleu no Minerál (MPM) apoia inisiativa empreza petrolífera, Santos Limited atu fura tán mina-matan tolu iha kampu petrolífera, Bayu-undan.

Ministériu Petróleu no Minerál, Víctor da Conceição Soares, informa MPM hamutuk ho Autoridade Nasionál Petróleu no Minerál (ANPM) hahú halo diskusaun inisiál atu aprova pedidu investimentu ne’ebé tuir previzaun ho kustu millaun $200.

“Ha’u hasoru ona empreza Santos Limited iha fulan kotuk no sira espera sira-nia inisiativa bele pasa. Ha’u hanoin Governu aseita tanba ida-ne’e mak ita hakarak duni atu kontinua produsaun to’o kalendáriu determinadu no la’ós to’o iha ne’e de’it, maibé di’ak liu kontinua nafatin,” tenik Ministru Víctor, hafoin ramata enkontru ho Xefe Governu iha Palásiu Governu, segunda ne’e.

Notísia Relevante: Empreza Santos planea fura mina-matan tolu iha Bayu-undan

Tuir governante ne’e, empreza internasionál ne’e hato’o ona proposta investimentu petrolífera ba ANPM, tanba ne’e parte Governu inklui autoridade presiza hasoru tan empreza Santos atu haree investimentu ne’e didi’ak no bele foti desizaun, nune’e empreza ne’e mós bele hanaruk tempu produsaun mina iha kampu Bayu- undan.

“Dadaun ne’e MPM no ANPM  inklui empreza Santos hahú halo diskusaun atubele aprova pedidu investimentu ne’e,” nia akresenta.

Empreza Santos mós iha intesaun atu investe iha konkursu públiku mina no gás iha bloku hamutuk 18, kompostu hosi iha tasi-laran 11 no iha rai-maran hitu.

“Ha’u hasoru empreza Santos sira iha intesaun atu investe ka envolve bloku 18, ne’ebé indetifikadu ona no lansa husi Primeiru-Ministru Taur Matan Ruak,” nia haktuir.

Empreza ne’e husu ona dadus jeolojia ba bloku 18 ne’e atu halo analiza no estudu ba potensialidade, tanba empreza iha inisiativa atu investe iha bloku rai-maran no tasi-laran.

Antes ne’e, Jerente Nasionál empreza Santos, José Lobato Gonçalves, hateten bainhira investimentu ne’e aprova hosi ANPM, maka empreza bele hanaruk tempu produsaun mina iha kampu Bayu-undan maizumenus tinan-ida tán.

Empreza Santos nu’udar operadór foun Bayu-undan, ne’ebé sosa partisipasaun Conochophilips ne’ebé akumula porsentu 60-resin no mós sai operadór iha kampu petrolífera ne’e.

Iha loron 28 maiu 2020, Conocophillips finaliza ona prosesu fa’an ativu petrolífera ne’ebé lokaliza iha Norte Austrália ba Kompañia Petrolífera Australiana, Santos Limited.

Conocophillips fa’an ninia interese iha planta prosesamentu Liquefied Natural Gas (LNG) Darwin iha kampu Bayu-undan, Barossa no Poseidon ho montante biliaun $1,4.

Interese ne’ebé tama iha akizisaun ativu Conocophillips maka hanesan negósiu ne’ebé envolve iha kampu Bayu-undan, rezerva seluk inklui mós eskritóriu iha Perth, Darwin no mós iha Dili.

Durante ne’e, projetu Bayu-undan kontribui reseita ba Estadu Timor-Leste, liuliu ba fundu mina-rai hamutuk biliaun $20 resin.

Hafoin retira husi projetu Bayu-undan, Conocophillips sei konsentra ba projetu iha Australia Pacific LNG iha Queensland.

Jornalista: Florêncio Miranda Ximenes

Editora: Julia Chatarina

HAKEREK NO HATÁN

Please enter your comment!
Please enter your name here