Aniceto Guterres, Prezidente Parlamentu Nasional. Imajen/Antonio Goncalves

DILI, 19 agostu 2020 (TATOLI)—Prezidente Parlamentu Nasionál, Deputadu Aniceto Longuinhos Guterres Lopes, hateten Governu mak tenke define prioridade hodi valoriza funu-na’in sira.

Notísia Relevante: Xefe Estadu defende harii uma ba veteranu

Prezidente Parlamentu Nasionál ko’alia asuntu ne’e relasiona ho Xefe Estadu Maiór, Majór Jenerál Lere Anan Timur, husu atu valoriza veterau sira hanesan mós ho eis-titulár sira.

“Só atu esklarese de’it katak ne’e fila-fali ba Governu hodi define prioridade ho ita-nia rekursu (osan) ne’ebé mak ita iha-ne’e, oinsá mak halo jestaun hodi jere didi’ak para nesesidade liuliu funu na’in sira-ne’e sira-nia nesesidade. Governu uluk atribui ona pensaun maibé sira-nia kondisaun moris seidauk di’ak maibé buat hotu Governu mak sei determina nia prioridade, liuliu oinsá mak jere rekursu sira-ne’e tanba ita iha esperiénsia tinan barak ona ka tinan 12 katak osan gasta barak tiha ona,” Aniceto Guterres informa liuhosi Konferénsia Imprensa, iha Salaun Konferénsia Parlamentu Nasionál, kuarta ne’e.

Nia dehan, la’ós parlamentu mak atu halo lei maibé prioridade tenke inisia hosi Governu tanba Governu mak determina hodi dignifika veteranu sira.

“Ida-ne’e depende ba prioridade, Governu mak determina maibé realidade osan mina-rai gasta besik hotu ona ka gasta osan barak loos tiha ona, agora povu sei ki’ak ne’e. Hotu-hotu lamenta, povu sei ki’ak. Nusá mak ida-ne’e mak tenke uluk maibé osan ne’ebé gasta barak tiha ona maibé ita la kestiona ida-ne’e, nia rezultadu mak ita ki’ak hela de’it,” Aniceto Guterres hateten.

Maske nune’e, Prezidente Parlamentu Nasionál afirma, preokupasaun veteranu sira-nian tenke rezolve tuir nia dalan.

“Definisaun prioridade ne’e importante dalaruma asuntu ne’ebé la importante ita gasta osan no gasta mós laloos, prioridade mós laiha depois to’o osan hotu povu sei terus ne’e, nusá,” nia dehan. 

Prezidente Parlamentu Nasionál ne’e haktuir, iha tempu 2002 no 2003 bele konsidera hanesan estadu foin mak hahú maibé oras ne’e tama ona tinan 20 no gasta osan barak tiha ona.

“Osan fundu mina-rai ne’e gasta tiha ona metade, rezultadu mak hanesan ne’e hela. Quer dizer buat ruma tenke hadi’a para labele fó kulpa de’it. Durante osan barak gasta ne’e, ha’u sei FRETILIN hanesan opozisaun, agora balun buka-dalan fó kulpa ba ema seluk, atu fase-liman tiha,” nia dehan. 

“Governu mak define prioridade, klaru Governu akompaña situasaun veteranu sira-nia kondisaun moris loron-loron nian,” nia haktuir. 

Notísia Relevante: PR Lú Olo husu povu fó onra ba asuwain FALINTIL

Jornalista : Evaristo Soares Martins

Editór       :  Cancio Ximenes

HAKEREK NO HATÁN

Please enter your comment!
Please enter your name here