Defensoria Públika Jerál, Câncio Xavier, lee termu juramentu iha serimonia tomada pose iha Palaçio do Governo. Imajen/Dok.Tatoli

DILI, 18 agostu 2020 (TATOLI)- Durante tinan-18, Governu Brazil liuhusi Agência Brazileira fó ona  apoiu asisténsia tékniku no asesoria maka’as ba dezenvolvimentu Defensoria Públika Timor-Leste.

Notísia Relevante : DP prepara nia reprezentasaun bainhira TR loke tan Tribunál Distritál

Defensor Públiku Jerál, Câncio Xavier, informa, Brazil ho Defensória Públika estabelese akordu kooperasaun  durante tinan-18 to’o ona iha sétimu etapa ne’ebé termina ona iha  loron 31   dezembru 2019.

Durante kooperasaun Brazil  fó apoiu maka’as tebes dezde inisiu instalasaun Defensoria Públika  ho  sistema sira hodi fortalese asesoria ba Defensoria Públika Jerál atu bele haree lei sira, kondisaun kooperasaun, dezenvolve konsellu superiór, dezenvolve pesa prosesuál.

Governu Brazil mós fasilita formasaun ba defensór sira kona-ba  kazu sira profisionalmente konsidera grau boot. Aléinde  ofisial no defensór ba hala’o  estudu komparativu haree ba area tékniku iha Brazil.

“Servisu sira ne’e la’o di’ak tebes   ne’ebé kontribui servisu ida profisionál ba kooperasaun durante tinan-18,” hateten Defensor Públiku Jerál, Câncio Xavier, ba Agênsia Tatoli, ohin, liuhusi telefone iha Dili.

Iha loron 7 juñu 2020, Governu liuhusi Ministru Justisa, Manuel Cárceres da Costa ho Embaixada Brazil mai Timor-Leste asina ona nota entendimentu ho Agência Brazileira ba kooperasaun (ABC-sigla portugés) hodi kontinua halo estensaun ka aumenta ba kooperasaun oitavu etapa 2021-2023.

Câncio Xavier hateten, daudaun ne’e parte Brazil hala’o hela prosesu edita hodi selesiona espesialista sira, hein katak to’o iha outubru, tinan ne’e, bele remata nune’e buat hotu la’o di’ak ho situasaun COVID-19 laiha ona sira bele mai ona Timor-Leste no iha  2021 bele hala’o ona servisu sira tuir akordu kooperasaun ne’ebé estabelese.

Akordu kooperasaun ba oitavu etapa ne’e, Brazil sei fornese espesialista na’in-rua ida sei koloka iha sentru formasaun jurídika no judisiál apoiu formasaun no ida sei koloka iha Defensoria Públika.

Defensoria Públika Timor-Leste mós husu atu fornese mós professor ida hodi fó formasaun lian portugés ba defensór públiku sira.

Jornalista   : Nelson de Sousa

Editór        : Francisco Simões

HAKEREK NO HATÁN

Please enter your comment!
Please enter your name here