Embaixadór Xina iha Timor-Leste, Xiao Jianguo. Imajen/Egas Cristovão

DILI, 17 agostu 2020 (TATOLI)-Governu Xina liuhosi ninia reprezentasaun iha Timor-Leste, Xiao Jianguo, kontinua hato’o apresiasaun ba Governu Timor-Leste, tanba ho esforsu maka’as hodi prevene no kombate surtu COVID-19.

Embaixadór Xiao Jianguo, hato’o apresiasaun ne’e liuhusi Vise Primeiru-Ministru no Ministra Solidariedade Sosiál no Inkluzaun (MSSI),  Armanda Berta dos Santos, segunda ne’e iha edifísiu MSSI Caicoli Dili.

Notísia Relevante :Fundasaun Alibaba Xina apoiu ekipamentu prevensaun COVID-19 ba TL

Nia dehan Xina sei kontinua fó apoiu ba Timor-Leste entermus fasilidades no seluktan hodi halo prevensaun no propagasaun ba transmisaun moras globál COVID-19.

“Ohin (segunda) ha’u hasoru malu ho Vise Primeiru-Ministru hodi ko’alia kona-ba Xina nia apoiu ba Timor-Leste oinsá bele kombate COVID-19,” dehan nia.

Tuir ninia observasaun katak situasaun en jerál iha Timor-Leste la’o di’ak maski enfreta hela moras coronavirus.

“Ami agradese no apresia Timor-Leste nia esforsu hotu ne’ebé ho sériu kombate COVID-19, maibé ita tenke kuidadu aan nafatin,” nia hateten.

Entretantu, Governu Xina iha loron 05 fulan-juñu liubá apoiu ona ekipamentu prevensaun COVID-19 hanesan máskara 40.000, hand sanitizer 560 ba Munisípiu Manatuto no Ministériu Administrasaun Estatál.

Iha loron 24 fulan-juñu Xina kontinua fó apoiu máskara 5.000-resin no hand sanitizer ba Parlamentu Nasionál.

Nune’e iha loron 01 fulan-jullu, Governu Xina liuhosi Embaixadór Xiao Jianguo, apoiu ona máskara ba Ministériu Ensinu Superiór Síensia no Kultura (MESSK) hanesan máskara 40.000 no hand sanitizer 560.

Notísia Relevante :Xina Hakarak Apoiu TL ba Rekupera Ekonomia

Alende ne’e, iha fulan-abríl no maiu liubá Xina fó ona apoiu ekipamentu prevensaun COVID-19 ba Ministériu Saúde hanesan térmometru, luvas, máskara, hand sanitizer no seluk tan.

Jornalista : Hortencio Sanchez

Editór       : Agapito dos Santos

HAKEREK NO HATÁN

Please enter your comment!
Please enter your name here