Logotipu JSMP

DILI, 17 agostu 2020 (TATOLI)-Organizasaun la’ós Governu nian  husi Programa Monitorizasaun Sistema Judisiál (JSMP-sigla ingles)  husu ba Prezidente Repúblika (PR),  Francisco Guterres ‘Lú Olo’ atu labele fó indultu no komutasaun  ba pena prizioneiru sira ne’ebé komete krime grave iha ámbitu komemorasaun loron konsulta popular, 30 agostu, tinan ne’e.

Notísia Relevante : MJ haruka lista dadur na’in-180-resin ba PR atu hetan indultu

JSMP husu atu  krime tranznasionál, krime graves, krime violasaun hasoru feto no labarik no krime korrupsaun mantein la hetan indultu no komutasaun ba pena.

Indultu no komutasaun ba pena nu’udar direitu ida prizioneiru sira-nian no normálmente iha kada loron boot nasionál  sira, Prezidente Repúblika ezerse ninia kompeténsia tuir konstituisaun hodi fó indultu no komutasaun ba pena ba prizioneiru sira ne’ebé prienxe ona kritéria sira hanesan, kumpre ona metade husi pena ne’ebé hamonu ba nia, idade avansadu, iha komportamentu di’ak no razaun umanitáriu hanesan moras ka seluk tan.

“JSMP rekoñese utilizasaun podér indultu nu’udar kompeténsia eskluziva ne’ebé konstituisaun RDTL fó ba Prezidente Repúblika no nu’udar direitu prerrogativa Prezidente nian. Maske nune’e, JSMP husu atu krime tranznasionál ka organizada, krime grave sira, krime violasaun hasoru feto no labarik no krime korrupsaun mantein la hetan indultu no komutasaun ba pena tuir lei prosedimentu indultu no komutasaun ba pena,” dehan Diretora Ezekutiva JSMP, Ana Paula Marçal liuhusi nota komunikadu JSMP nian ne’ebé Agência Tatoli asesu, ohin.

 Nota komunikadu ne’e mós haktuir katak, iha tinan 2020 ne’e, Governu liuhusi Ministériu Justisa aprezenta no rekomenda lista prizioneiru hamutuk na’in-184 ba Prezidente  Repúblika hodi bele fó indultu no komutasaun ba pena iha komemorasaun loron restaurasaun independénsia ba dala-XVIII.

Husi totál ne’e, iha maiu 2020, bazeia ba dekretu Prezidente númeru  41/2020, 28 Maiu, Prezidente Repúblika (PR) Francisco Guterres “Lú Olo” fó indultu ba prizioneiru sira ne’ebé maioria ho pena tinan-haat mai kraik.

Husi total ne’e prizioneiru na’in-17 hetan liberdade totál no prizioneiru na’in-ida hetan indultu parsiál, mezmu iha hela situasaun Estadu emerjénsia.

Enkuantu ba prizioneiru seluk Prezidente Repúblika sei fó indultu iha 30 agostu iha tinan ida ne’e.

JSMP hanoin katak atu asegura no hametin konfiansa públiku nian ba iha sistema justisa, presiza tetu didi’ak ba prosesu indultu ka kualkér forma ne’ebé Prezidente utiliza tenke iha opsaun atu hamenus pena gradualmente, la’ós hasai totál husi prizaun hanesan prátika sira ne’ebé durante ne’e akontese.

Iha tinan sira ba kotuk, antes lei prosedimentu indultu no komutasaun ba pena diskute no aprova, JSMP halo advokasia atu krime sira mensiona iha leten la bele hetan indultu.

Iha momentu ne’ebá JSMP hasoru bankada sira iha Parlamentu Nasionál no deputadu sira ne’e konkorda atu Prezidente la fó indultu ba krime tranznasionál, krime grave sira, krime violasaun hasoru feto no labarik no krime korrupsaun. Tanba bainhira krime sira ne’e mak nafatin hetan indultu ne’e klaru sei fó imajen ladiak ba povu no Estadu direitu demokrátiku.

Finalidade lei indultu promulga liuhusi lei númeru 5/2016, 25 Maiu kona-ba Prosedimentu de konsesaun  indultu no  komutasaun pena no lei ne’e konsidera krime sira mensiona iha leten la hetan indultu (artigu 4 kona-ba crimes insuscetíveis de indulto).

JSMP hein katak iha 30 agostu 2020, Prezidente sei foti desizaun tuir rekizitu sira iha lei refere.

Jornalista   : Nelson de Sousa

Editór        : Francisco Simões

HAKEREK NO HATÁN

Please enter your comment!
Please enter your name here