Diretór Jerál CCT, Sisto Moniz Piedade, dadalia ho jornalista sira hafoin hala'o enkontru ho Primeiru-Ministru, Taur Matan Ruak, iha Palásiu Governu, segunda (17/08). Imajen Tatoli/ Egas Cristovão

DILI, 17 agostu 2020 (TATOLI)-Kooperativa Kafé Timor (CCT, sigla portugés) sosa ona produtu órganika Baunilla hamutuk tonelada 11 hosi agrikultór nasionál no konsege esporta balun.

“CCT la’ós sosa kafé de’it maibé sosa mós Baunilla, ne’ebé ami hola Baunilla bokon tonelada 11 no halo esportasaun tonelada rua ba rai-li’ur,” hateten Diretór Jerál CCT, Sisto Moniz Piedade, hafoin relata serbisu ba Primeiru-Ministru (PM), Taur Matan Ruak iha Palásiu Governu, segunda ne’e.

Notísia Relevante: MAP Promete Rezolve Folin Baunilla

Responsável ne’e dehan, kualkér produtu ne’ebé mak sira sosa, ninia presu sei bazeia ba merkadu mundiál enkuantu Governu seidauk define.

“Kualkér produsaun ne’ebé ami sosa ne’e ninia presu ami halo karta ba Ministériu Agrikultura no Peska (MAP). Baunilla antes ne’e klase A kada kilograma $50 no klase B $40, maibé agora klase A $20 no klase B $15, presu merkadu tinan ne’e tun, labele hanoin katak presu ne’e mantein tanba presu ne’e sa’e tun hela de’it,” nia subliña.

Direjente CCT ne’e realsa, presu ba Baunilla ka produtu seluk sei la normál, maski nune’e importante liu maka produsaun ne’e tenke aumenta.

“Produsaun ne’e tenke amenta, la’ós kuda hun ida ka rua ko’alia barak, maibé tenke kuda barak tanba kafé mós tenke hadi’a,” nia akresenta.

Jornalista: Antónia Gusmão

Editora: Julia Chatarina

1 KOMENTÁRIU

  1. CCT ne’e empreza “gangster”, uluk hatuun kafe folin, agora ho problema COVID-19 nia halo monopoliu di’ak tanba empreza sira leuk la mai halo kompetisaun ho nia.

HAKEREK NO HATÁN

Please enter your comment!
Please enter your name here