Baunilla iha plantasaun CCT Railaco. Imajen Tatoli/António Gonçalves

DILI, 16 jullu 2020 (TATOLI) – Ministru Agrikultura no Peska, Pedro Reis promete sei rezolve folin buanilla kada kilograma, tanba fó vantajen boot tebes ba agrikultór sira tanba bele hadi’a sira-nia ekonomia família.

“Loos duni katak baunilla ne’e antes folin sa’e, maibé lahetene oinsá maka derepente folin tun ha’u seidauk iha komunikasaun ho sira. Ha’u promete atu buka solusaun ba ida ne’e, antes ne’e nia folin to’o $50 kada kilograma maibé agora tun kedas ba $20. Baunilla ne’e ninia folin kapás liu kafé,” hateten Ministru Pedro Reis ba Agência Tatoli iha Palásio Governu, kuarta (15/07).

Notísia Relevante: Agrikultór Preokupa Folin Baunilla, CCT Adopta Folin Mundiál Tanba Governu Seidauk Define

Governante ne’e dehan, Governu liuhosi Ministériu Agrikultura no Peska (MAP) mós planea ona katak sei kuda tán produtu hanesan maek no seluk tán.

“Produtu barak maka sei kuda maibé importante mak ho maluk sira ne’ebé sosa na’in, tanba vantajen baunilla boot tebes ba komunidade tanba bele sosa karreta no motorizada,” nia subliña.

Baunilla iha plantasaun CCT Railaco. Imajen Tatoli/António Gonçalves

Ministru mós simu ona konvite hosi agrikultór baunilla Ermera atu partisipa iha seremónia kolleta baunilla iha Munisípiu Ermera semana ne’e.

Antes ne’e, agrikultór baunilla iha Ermera proukupa ho folin baunilla kada kilograma tanba Kooperativa Kafé Timor (CCT, sigla portugés) ne’ebé bainbain sosa sira-nia produtu, hatún folin adapta ho folin globál tanba iha rai-laran Governu rasik seidauk define folin ba produtu agrikultór ne’e.

Jornalista: Antónia Gusmão

Editora: Julia Chatarina

1 KOMENTÁRIU

  1. CCT ne’e kooperativa mafioza no oportunista. Uluk kafe folin di’ak maibe ikus mai tuun tiha, agora ba fali baunilla. CCT hatene aproveita situasaun tanba agora fronteira ho Indonezia sei taka hela, nune’e laiha kompetisaun. Ida-ne’e maka halo nia halo monopoliu maka’as hodi hatuun baunilla nia folin.

HAKEREK NO HATÁN

Please enter your comment!
Please enter your name here