DILI, 17 agostu 2020 (TATOLI)- Komandu Polísia Munisípiu Dili apresia ho asaun pasífiku husi Aliansa Universitáriu Timor-Leste (AUTL) ne’ebé hala’o, ohin, kompre regra mezmu hetan seguransa másimu husi polísia.
Notísia Relevante : AUTL aprezenta karta koñesimentu atu halo asaun pasífiku hasoru Governu
Segundu Komandante Polísia Munisípiu Dili, Superintendente Euclides Belo, hateten, bainhira estudante sira halo asaun tuir regra sei kontribui ba estabilidade.
“Komandu Munisípiu Dili garante seguransa komesa husi tuku 7:00 koloka ami nian membru tránzitu hodi apoiu seguransa, liña primeiru koloka mós polísia feminina, inklui Polisiamentu Komunitária hodi halo koordenasaun ho manifestante sira la’o di’ak tebes,” dehan Euclides Belo ba jornalista iha Komandu PNTL, Caicoli, Dili.
Euclides dehan, asaun ne’e la’o di’ak tebes, tanba estudante ezije liu ba Ministru Ensinu Superiór ligadu ba subsídiu ne’ebé tuir AUTL nian haree mosu diskriminasaun.
Euclides Belo husu atu manifestante sira kumpre nafatin regra ligadu ba lei númeru 1/2006.
“AUTL aseita, no deklara katak sei kumpre lei hotu-hotu, liuliu lei númeru 1/2006 kumprimenta loloos, no tuir nafatin prosedimentu ne’ebé mak sira hato’o ba komandu PNTL, nune’e mós sira kumpre lei númeru 5/2017 labele lori sasán kro’at,” nia apela.
Portavós AUTL, Moises Soares Magno mós apresia asaun la’o di’ak no hetan apoiu seguransa másimu husi PNTL hodi asegura seguransa para grupu seluk labele hamosu konflitu ruma.
Nia hatutan, AUTL rasik promete ona bainhira iha asaun manifestasaun ne’e mak mosu aktu ne’ebé viola lei, ka hamosu anarkizmu iha asaun ne’e, sira ne’ebé hanesan koordenadór sei responsabiliza ba asaun hirak ne’e.
Tuir observasaun Agência Tatoli nota, efetivu hirak ne’ebé halo seguransa iha asaun pasífiku ne’e kompostu husi Servisu Informasaun Polísia (SIP) no ekipa Polísia Dili hetan apoia husi Unidade Espesiál Polísia (UEP), Batallaun Orden Públika (BOP) no Seguransa Dirasaun Nasionál Servisu Patrimóniu Estadu (DNSPE).
Jornalista : Eugénio Pereira
Editór : Francisco Simões
