Komandante Unidade Patrullamentu Fronteira (UPF), Superintendente João Sancho Pires. Imajen/Eugénio Pereira

DILI, 01 jullu 2020 (TATOLI)- Komandante Unidade Patrullamentu Fronteira (UPF) foun, Superintendente João Sancho Pires, promete sei kontinua lori UPF hametin nafatin seguransa iha lutu fronteira terrestre no kria nafatin kooperasaun di’ak ho autoridade seguransa Indonézia nian.

Notísia Relevante : Komisáriu Faustino da Costa Fó Pose Ofisiál Superior PNTL Na’in-25 

Superintendente João Sancho Pires, durante ne’e assume knaar hanesan segundu Komandante UPF sempre hamutuk ho eis Komandante UPF, Superintendente João Belo dos Reis, halo servisu di’ak tebes ho membru sira oinsá garante pás iha fronteira.

“Servisu ne’ebé ha’u sei halo mak hamutuk ho membru sira kontinua garante seguransa iha fronteira, kontrola movimentu ema tama sai no kontrola atividade negósiu ilegál sira, inklui kria nafatin kooperasaun di’ak ho autoridade seguransa hosi Indonézia iha liña fronteira sira hotu,” afirma Komandante UPF, João Sancho, ohin, ba jornalista iha Kuartél Jerál PNTL, Caicoli, Dili.

Nia hatutan, daudaun ne’e UPF halo servisu maka’as tebes garante seguransa oras 24 iha liña fronteira terrestre hodi evita ema tama sai ho ilegálmente hodi próteze mós importasaun surtu Coronavirus ka COVID-19 mai Timor-Leste.

Komandante ne’e mós hato’o agradese ba konfiansa husi Komandante Jerál PNTL, Komisáriu Faustino da Costa no Ministru Interiór, Taur Matan Ruak,  hodi fó fiar ba nia lidera UPF.

Iha tempu besik Komandante UPF, João Sancho Pires  sei hala’o enkontru ho komandante unidade sira iha Aeroportu Dili no postu sira iha fronteira hodi fó orientasaun ba UPF relasiona ho prosedimentu pratika ka funsaun espesializada no seguransa fronteira bainhira hala’o sira nia knaar.

Tuir Baze legál, mandatu ba PNTL nia iha UPF ne’e nomeia  hosi Governu liuhosi Dekretu-Lei nú.9/2009, loron-18 fulan Fevereiru, kona-ba lei orgánika Polísia Nasionál Timor-Leste, artigu 33 ne’ebé hala’o nia funsaun patrullamentu no vijilánsia iha fronteira territoriál sira.

Jornalista   : Eugénio Pereira

Editór        : Francisco Simões

HAKEREK NO HATÁN

Please enter your comment!
Please enter your name here