Diretor Ezekutivu Asosiasaun Halibur Defisiénsia Matan Timor-Leste (AHDMTL), Gaspar Afonso.Imajen/Joanico de Araújo.

DILI, 14 agostu 2020 (TATOLI)–Diretór Ezekutivu Asosiasaun Halibur Defisiente Matan Timor-Leste (AHDMTL), Gaspar Afonso, hatete Primeiru-ministru  Taur Matan Ruak mak motiva no enkoraja AHDMTL atu kria banku rasik hodi bele fasilita membru sira tau osan hamutuk.

“Planu no hanoin ida ne’e ha’u hetan motivasaun no enkoraja hosi sénior Primeiru-Ministru, Taur Matan Ruak, bainhira ha’u ba halo enkontru ida ho Primeiru-Ministru. PM enkoraja AHDMTL atu kria banku rasik hodi bele fasilita membru sira tau osan hamutuk,” dehan Diretór Ezekutivu Asosiasaun Halibur Defisiente Matan Timor-Leste (AHDMTL), Gaspar Afonso, ba Agência TATOLI liuhosi telefonika, kinta ne’e. 

Nia dehan, planu ba sistema kreditu hodi loke banku ne’e sei prioridade ba Asosiasaun Halibur Defisiente Matan Timor-Leste ne’ebé mak durante ne’e hamahan-aan iha AHDMTL.

Tanba, nia dehan, durante ne’e nia akompaña maluk defisiénsia matan bainhira simu subsídiu hosi Governu ne’e gasta fali ba lia no gasta sira-ne’e laiha folin.

“Entaun ha’u iha hanoin ida katak di’ak liu kria grupu kooperativa ida ba ema ho defisiénsia matan hodi tau sira rai osan hamutuk. Depois ita haree tinan lima (5) mak osan barak ona, ita hanoin ona no hakarak halo sistema kreditu hodi loke banku ba sira-nia aan no família,” nia hateten. 

Ho ida-ne’e, nia haktuir, ba futuru (2021) sei implementa planu estatéjia tinan fiskál dahuluk nian mak atu estabelese kooperativa ba AHDMTL.

“Ha’u iha hanoin ida katak subsídiu ne’ebé mak hetan kada fulan neen (6) ne’e, ami gasta leet de’it. Di’ak liu tau hamutuk iha fatin ida,” nia esplika.

Jornalista : Osória Marques

Editór      : Cancio Ximenes

HAKEREK NO HATÁN

Please enter your comment!
Please enter your name here