DILI, 21 jullu 2020 (TATOLI) – Kargu Xefia sira hosi liña ministériu hamutuk ema na’in-50 hato’o agradese ba matéria formasaun “Governansa no Lideransa Estratéjia” ne’ebé hala’o hosi Institutu Defeza Nasionál Timor-Leste (IDN-TL).
Notísia Relevante : IDN-TL Fó Formasaun Ba Kargu Xefia Na’in-150 Kona-ba Governansa no Lideransa Estratéjiku
Servidór Administrasaun Públiku (SAP) kompostu hosi Diretór/a Jerál, Diretór/a Nasionál no Inspetór/a Jerál hamutuk na’in-50 iha turma B hato’o agradese tanba durante semana ida partisipa formasaun aprende no absorve matéria pertinente ne’ebé fó hosi Diretór IDN, Kapitaun de Mar- e Guerra Donaciano Costa Gomes “Pedro Klamar Fuik”.
“Apresiasaun ne’e hato’o hosi kolega sir- hotu, hosi sira-nia komentáriu ne’ebé ami fahe iha li’ur, hatudu ami iha apresiasaun boot ida konteúdu matéria ne’ebé fahe ba ami iha semana ida nia laran hodi ami bele deskobre problema, interese no dezafiu ne’ebé ita nia rai laran implementa hela,” hateten diretór jerál Institutu Nasionál Admirasaun Públiku (INAP), Agustinho Letençio de Deus.
Liuhosi nota komunikadu ne’ebé Agêncía Tatoli asesu, ohin, Diretór INAP, Agustinho hateten, servisu ne’ebé sira halo foku iha administrasaun públika no haree matéria hosi IDN-TL pertinente tebes atu sira hotu bele aprende, nune’e sai lisaun bainhira foti desizaun ruma liga ba administrasaun públiku atu la’o tuir regra.
“Formasaun ne’e labele to’o de’it iha grupu ida ne’e, maibé kontinua nafatin hanesan servisu hamutuk ne’ebé INAP ho IDN-TL halo importante tenke iha kontinuidade,” nia hateten.
Iha fatin hanesan, Diretora Jerál Ministériu Finansas, Monica Rangel da Cruz, orgullu bele hetan oportunidade tuir kursu avansadu governansa no liderança estratéjia ne’ebé hato’o hosi IDN-TL pertinente tebes atu organiza servisu hodi hakotu burokrasia téknika sira.
“Ami presiza kursu sira nune’e, promove tan ami nia kapasidade individuál hodi suporta ami nia kapasidade no hadi’a instituisaun ne’ebé ami serbí ba,” nia hateten.
Hametin Unidade Nasionál
Diretór Jerál Ministériu Administrasaun Estatál (MAE), Horacio do Santos Marques observa durante semana ida tuir formasaun aprende esperiénsia barak hodi bele koñese formatu liña fronteira marítima sira, oinsá bele fó sasukat saída kona-ba fatór internal no esternál hodi fó benefísiu Estadu RDTL.
Nia hatutan, ba oin IDN-TL presiza kria mós formatu formasaun ida kona-ba Unidade Nasionál ne’ebé tenki hahú hosi lideransa Timoroan tomak hodi hametin pilar forma Estadu RDTL ida ne’ebé metin liután.
“Ha’u nia espetativa se bele karik ba oin mai IDN-TL kria tan modul ida, kona-ba Unidade Nasional hodi fó ba ita nia lideransa nasionál. Tanba ha’u haree ita nia lideransa nasionál sira seidauk iha unidade,” nia afirma.
Diretór IDN-TL, Guilherme Soares, esklarese katak formasaun avansadu ne’e IDN-TL inisia tiha ona ba membru Governu sira iha loron 6 jullu 2020.
Kursu Avansadu ba Lideransa Governansa no Lideransa Estratéjika realiza tanba hetan parseria ho Gabinete Primeiru-Ministru, Komisaun Funsaun Públiku (CFP), INAP, Fundu Dezenvolvimentu Kapitál Umanu (FDCH) ho IDN-TL, bazeia ba orientasaun hosi Primeiru-Ministru Taur Matan Ruak.
Jornalista : Eugénio Pereira
Editór : Francisco Simões