Ministru Koordenadór Asuntu Ekonómiku interinu no atuál Ministru Reforma Lejizlativa no Asuntu Parlamentár, Fidelis Manuel Leite Magalhães. Imajen Tatoli/Antónia Gusmão

DILI, 21 maiu 2020 (TATOLI) – Governu liuhosi reuniaun Konsellu Ministru estraordinária, delega kompeténsia ba Prezidente Sentru Lojíztiku Nasionál (CLN, sigla portugés), Agusto Junior Trindade hanesan reprezentante Governu nian ne’ebé maka iha kompeténsia bele selebra kontratu ho Vietname hodi sosa foos tonelada 30.000.

“Konsellu Ministru aprova selebrasaun kontratu atu sosa foos tonelada 30.000 hosi Repúblika Sosialista Vietname. Komisaun Nasionál Aprovizionamentu (CNA, sigla portugés) mak halo prosesu aprovizionamentu ho kolaborasaun ho projetu na’in maka CLN”, relata Ministru Koordenadórr Asuntu Ekonómiku interinu, Fidelis Manuel Leite Magalhães liuhosi konferénsia imprensa iha Salaun Ministériu Finansa, Aitarak-laran, kinta ne’e.

Notísia Relevante: CLN Sei Iha Foos Tonelada 196, Hein Importasaun Husi Vietname

Entretantu, planu sosa foos ne’e tama mós iha pakote sosio-ekonómiku nian, ne’ebé hetan ona aprovasaun hosi KM antes ne’e hamutuk ho medida sira seluk iha pakote ekonómiku.

Antes ne’e, Prezidente CLN deklara daudaun ne’e stock nasionál  ne’ebé parte CLN no setór privadu iha la sufisiente ona atu responde nesesidade populasaun Timor-Leste bainhira infrenta situasaun ruma iha fulan-tolu ka haat mai.

CLN to’o oras ne’e iha de’it foos tonelada 196, enkuantu tuir Dirijente ne’e, konsume nasionál foos ba fulan-ida hamutuk tonelada 11.142, tanba ne’e bainhira foos husi Vietname mai tan sei bele sustenta populasaun durante fulan-tolu nia laran.

Antes ne’e, setór privadu sira mós halo ona akizisaun foos husi rai-li’ur hodi haforsa stock nasionál.

Hanesan iha loron 28 foin lalais, foos hamutuk tonelada 2.700 ho na’in husi Timor Food, Lda, atraka iha Portu Dili.

Primeiru Vise Prezidente Autoridade Portuáriu Timor-Leste (APORTIL), José Manuel Marques, informa tan durante períodu Estadu Emerjénsia, foos hamutuk tonelada 4.150 husi rai-li’ur maka to’o Timor-Leste no na’in maka setór privadu.

Jornalista: Antónia Gusmão

Editora: Julia Chatarina

HAKEREK NO HATÁN

Please enter your comment!
Please enter your name here