DILI, 22 jullu 2020 (TATOLI) – Reuniaun Konsellu Ministru (KM) kuarta ne’e ezekutivu sira kontinua halo analiza rekomendasaun hosi Komisaun Elaborasaun Planu Rekuperasaun Ekonómika.
Ministru Prezidénsia Konsellu Ministru, Fidelis Manuel Leite Magalhães, hateten KM kontinua analiza rekomendasaun lubuk ida kona-ba medida ba prazu badak, ne’ebé ba faze dahuluk hosi mitigasaun ba impaktu krize surtu COVID-19, ne’ebé Komisaun ba Elaborasaun Planu Rekuperasaun Ekonómika propoin.
“Medida ba prazu badak hirak ne’e ninia objetivu maka atu apoia satizfasaun sidadaun sira-nia nesesidade bázika, tulun traballadór sira hosi setór informál mantein empregu no rendimentu no mantein empreza sira iha merkadu,” relata Ministru Fidelis hafoin ramata reuniaun ezekutivu iha Palásiu Governu.
Governu sei kontinua análize kona-ba pakote medida sira ba prazu badak ne’e iha sorumutuk Konsellu Ministru nian tuirmai.
Iha loron 18 juñu, Primeiru-Ministru (PM), Taur Matan Ruak, fó pose ba estrutura Komisaun Elabora Planu Rekuperasaun Ekonómika, ne’ebé kompostu husi Prezidente Komisaun, Rui Augusto Gomes no ninia vogál na’in-haat maka Rui Maria de Araújo, Manuel Vong, Carlos da Silva Lopes Saky, no Berta Montalvão.
Kriasaun komisaun ne’e bazeia ba Projetu Rezolusaun Governu, ne’ebé aprezenta husi Xefe Governu iha reuniaun ordinária KM iha 10 juñu no hetan ona aprovasaun.
Servisu komisaun ne’e durante loron-60 hodi prepara planu ba rekuperasaun nian, nune’e elaborasaun planu bele aprezenta ba KM.
Governu fó atensaun maka’as ba impaktu sosiál no medida ekonomika, ne’ebé prevee ona millaun $142-resin no sei esforsu ba implementasaun no ezekusaun duodesimál ho di’ak, nune’e iha faze tuirmai bainhira iha rekuperasaun no kresimentu la presiza halo esforsu boot ona maibé oitoan hodi bele ajuda hasa’e nível seluk.
Jornalista: Antónia Gusmão
Editora: Julia Chatarina
