Prezidente Konsellu Administrasaun BNCTL, Brígido de Sousa. Imajen Tatoli/Egas Cristovão

DILI, 12 agostu 2020 (TATOLI)-Banku Nasionál Komérsiu Timor-Leste (BNCTL, sigla portugés), simu ona aplikante ne’ebé hakarak partisipa iha programa moratóriu hamutuk 3.197 no hosi númeru ne’e, individuál, funsionáriu públiku ka kontratadu hamutuk na’in-3.154 no ba empreza hamutuk 43.

Prezidente Konsellu Administrasaun BNCTL, Brígido de Sousa, hateten bainhira anúnsia ofisialmente, kliente barak tebes maka aplika, tuir lista ne’ebé mak BNCTL iha to’o loron 05 agostu iha ona aplikante hamutuk 3.197.

“Hosi aplikante 3.197, BNCTL simu sira ne’ebé maihosi individuál, signika katak sira ne’ebé goja kréditu ba nesesidade konsuntivu hanesan funsionáriu públiku kontratu sira maka barak liu hamutuk 3.154 no ba empreza sira hamutuk 43,” tenik Prezidente BNCTL ne’e ba Agência Tatoli, foin lalais ne’e ihha ninia knaar fatin, edifísiu Timor Plaza.

Notísia Relevante: Setembru, BCTL anúnsia lista benefisiáriu programa moratóriu kréditu

Iha loron 23 jullu maka Banku Sentrál ne’e ofisialmente fó sai anúnsia katak loke aplikasaun ba programa moratóriu kréditu no kliente sira bele aplika liuhosi sistema online ne’ebé banku ne’e rasik dezenvolve.

“Atu sai benefisáriu programa ne’e, aplikasaun kliente tenke aprovadu, hafoin Banku Komérsiu haruka ba Banco Central Timor-Leste (BCTL) hodi hetan aprovasaun maka kliente bele benefisia programa moratóriu kréditu durante fulan-tolu, sira sei iha suspensaun selu prinsipál kréditu ne’ebé sei hahú fulan-agostu to’o outubru 2020,” nia esplika.

Benefisiáriu ba programa ne’e sei selu jurus ba banku mensalmente ho porsentu 40 no porsentu 60 sei selu hosi Estadu ba banku ne’ebé kliente foti kréditu.

Brígido de Sousa haktuir, BNCTL halo hela revizaun tanba tenke halo avaliasaun hodi haree aplikante nia elejibilidade.

“Banku halo ona avaliasaun, daudaun iha 2.955 maka iha prosesu avaliasaun no 19 maka aprova ona, no haruka ona ba BCTL no Banku Sentrál sei halo fali revizaun, kuandu sira aprova haruka ba BNCTL maka  hahú implementa programa moratóriu kréditu,” nia akresenta.

Loron avaliasaun tarde liu mak loron 14 agostu, kuandu ramata ona avaliasaun maka submete ba BCTL hodi hetan aprovasaun.

BNCTL simu rejistrasaun kliente 18.000

BNCTL rejista ema hamutuk 17.000 to’o 18.000, maibé programa moratóriu kréditu ne’e aplika de’it ba sira foti kréditu antes loron 01 marsu 2020 no sira ne’ebé foti kréditu hosi loron 11 marsu 2020 to’o mai agora ne’e la elijivel.

“Signifika sira ne’ebé merese atu benefisia programa ne’e to’o de’it iha loron 28 fevereiru 2020, no sira ne’ebé to’o 28 fevereiru ne’e sira tama iha kategoria selu di’ak hela ka sira la selu tarde liu loron 60. Ida-ne’e kritéria ne’ebé BCTL hatuur hamutuk ho banku sira,”nia esplika.

Brígido nota katak, partisipasaun ba programa moratóriu kréditu mínimu tebes tanba rejistasaun ho sistema ne’e online, entaun ema barak mak ladún iha koñesementu hodi asesu ba internet no laiha meiu atu aplika, tanba sistema Banku Sentrál no banku sira seluk dezenvolve hamutuk la liu hosi email maibé website.

Razaun ida, Prezidente BNCTL ne’e observa katak kliente sira konsiente katak bainhira sira partisipa iha programa ne’e maka sira sei hetan benefísiu no sira bele goja suspensaun atu selu kréditu prinsipál durante fulan-tolu.

“Signifika katak sira-nia períodu atu selu kréditu ne’e sei estende tán fulan-tolu no individuál ne’ebé mak hatama aplikasaun hamutuk 3.154 no empreza sira 43,” nia akresenta.

Dirijente ne’e lamenta tanba partisipasaun empreza privadu menus kompara ho funsionáriu públiku.

“Ha’u ladún kontente tanba loloos programa ne’e atu benefisia empreza sira tanba sira mak sofre liu durante implementasaun Estadu Emerjénsia tanba limitasaun movimentasaun ema, ema barak lakon serbisu, hafoin sirkulasaun osan ladún barak. Tanba ne’e ekonomia Timor-Leste paralizadu, entaun sira-nia rendimentu menus no sira iha problema atu selu fali sira-nia obrigasaun ba banku,” nia subliña.

Brígido hatutan: “Infelizmente setór privadu sira, liuliu empreza sira-nia interese ba programa ne’e ladún boot, la to’o porsentu ida hosi aplikasaun ne’ebé BNCTL simu. Ha’u lahatene tanba sá, parese sira la persiza ka balun la hatene atu aplika, no balun karik sira-nia negósiu ne’e di’ak fali ona.”

Prezidente BNCTL ne’e dehan, funsionáriu públiku sira benefisia ona programa barak maibé iha programa moratóriu kréditu partisipasaun setór públiku maka barak liu.

“Ha’u lamentável loos tanba sira tenke benefisia husi programa ne’e tanba individuál sira durante Estadu Emerjénsia ne’e sira simu direitu nafatin hanesan saláriu no simu tán subsidiu família, pulsa eletrisidade, la tama serbisu durante Estadu Emerjénsia, sira-nia oan mós la eskola, tuir loloos ne’e laiha razaun ba individuál sira atu aplika ba programa ne’e tanba sira simu hela direitu ne’e pursentu 100, maibé realidade sira mak barak liu,” nia realsa.

Brígido dehan, aplikante ne’ebé mak priense ona banku sei halo avaliasaun, maibé balun la priense rekezitu maka sei labele aprova tanba tuir BNCTL katak aplikante balun priense formuláriu liuhosi online ne’e la loos no haruka aplikasaun maibé laliu husi sistema online, balun priense formuláriu online la loos.

“Ami nota aplikasaun ne’ebé haruka mai, ema sira priense formuláriu online ne’e la priense ho kuidadu, maibé formuláriu ne’ebé Banku Sentrál halo simples tebes maibé kuandu la hatene klik de’it sinál pergunta ne’e bele hatene ona. Maibé balun enxe la loos invez enxe naran maibé tau fali loron moris, naran sala, númeru eleitóral sala, ka osan ne’ebé sira kréditu ne’e sala, balun ami bele hadi’a ne’e ami halo maibé balun ami labele entaun la liu avaliasaun ona,” nia esplika.

Jornalista: Antónia Gusmão

Editora: Julia Chatarina

HAKEREK NO HATÁN

Please enter your comment!
Please enter your name here